Chelsea beiseina a la nung reng An hmaa ding tur Arsenal

Thawhṭanni zasn khan Tammy Abraham-a goal hnih leh Thiago Silva tauh luh hmangin Chelsea chuan an mikhual West Ham 3-0 in an hneh. Frank Lampard enkawl team hi club lian lakah nem deuh ṭhin mah se Premier League nomawi an beiseina a la nung.

Blues hian pangana ni chungin Krismas an hmang dawn. Ruai ṭheh ni (December 26) zan dar 11:00-ah Arsenal hmachhawn turin Emirates Stadium an pan ang a, kumin Boxing Day inkhel nghahhlelhawm ber zinga mi a ni.

Inkhel dangah team talbuai Burnley chuan Ashley Barnes leh Chris Wood te goal hmangin Wolves 2-1 in an hneh ve bawk. Mikhual team tan Fabio Silva-a'n hun tawp dawnah penalty khung ve mah se awmzia a nei phak tawh lo.

Nipui bazarah sum an hman hnem avangin season ṭan hma aṭangin Chelsea thawm a na. Leeds United hneh chungin Premier League hma an hruai zuai a, mahse a hnu lamah Everton leh Wolves an ngam loh avangin pariatnaah an tlahniam.

Thawhṭan zan Stamford Bridge-a inkhelah defender Thiago Silva-a'n minute 10-na lekah corner aṭanga ball lo kal chu a tauh lut. Blues lamin goal khung hmasa mah se Hammers lamin inkhel an thunun thung a, goal erawh an sual chhuak thei lo.

Olivier Giroud aia inkhel bul ṭantir Abraham-a'n a hun ṭha neih a khawhral duh bik lo. English striker hian second half minute 78 leh 80-naah goal khungin team a chakpui. Timo Werner chuan goal khung lo mah se Abraham goal hmasa zawk hi a siamsak a ni.

Hnehna changtu Blues hian point 25 an nei a, hmahruaitu Liverpool an phak lohna chu point ruk a ni. West Ham erawh season bul ṭan ṭha mah se tun hnaiah an khel ṭha tawk lo, point 21 hmuin 10-naah an awm thung.

Point thum an hmu a, anmahni lamah goal a lut lo bawk - Chelsea tan lawmna tur a ni. Amaherawhchu London club hian an defender pawimawh Ben Chilwell chu minute 10-na lekah hliam vangin an chan, a hliam nat dan hi hriat chian a la ni lo.

Blues hian Reece James chu khup hliam vangin an chhawr thei lo mek bawk a, manager Lampard tan a player pawimawh pahnih inhliam hi buaina tham a ni. Chutih rualin Cesar Azpilicueta leh Emerson Palmieri an neih avangin lungngaih lutukna tur a ni hran lo ang.

Lampard chuan, "Player inhliam pahnih dinhmun tak hi hriat chian theih a la ni lo a, an chawlh chen tur pawh a la hriat lo. Chutih rualin krismas bawra match kan khelh hunah chuan an inlan thei ka beisei," tiin a sawi.

English manager chuan sawi zawmin, "A zawna match hnih kan chak loh avangin sawisel kan hlawh. Tunah erawh kan nihna tak a lang leh ta. Hmasawnna tur tam tak kan la nei a, tun ṭuma kan khelh ang hian khel zel thei ila duhthusam a ni," a ti.

David Moyes kaihhruaina hnuaiah West Ham-in hma an sawn a, mi tam tak beisei aia ṭhain season bul an ṭan. Mahse Chelsea lakah erawh an vanduai. Silva-a'n a tauh goal kha 2020-21 season bika set piece aṭanga goal an chhuah vawi khatna a ni.

Goal an chhuah hnuah pawh Hammers hian ball an chang hnem, mahse Blues tlarhnung an ṭhiat thei lo. Crystal Palace laka goal ropui khungtu Sebastian Haller leh Michail Antonio ten hun ṭha nei mah se an vannei tawk lo.

Moyes chuan, "3-0 in kan chak lo, goal lut chauh thlir chuan chiang taka chak lo kan ang hle. Amaherawhchu team pahnih inthlauhna kha a tam lo. Kan vanneih ṭum chu ni se goal kan khung ngei ang, tihsual zeuh kan nei ṭhin kha a pawi lai chu a ni ve bawk.

"Season kal laiah chuan kan tan fiahna hautak ber a la nih hial ka ring. Derby a nih tawh chuan a boruak hi a danglam ṭhin. Player tam zawkin an khel ṭha a, chutih rualin point hmu tur erawh chuan kan khel ṭha tawk lo a ni," a ti.