Spurs leh United tan nomawi?

Tottenham Hotspur leh Manchester United-in nomawi an beisei a nih chuan League Cup an ngaihthah a thiang lo.

Zanin dar 11:00 hian Tottenham Hotspur-in League Cup quarterfinal-ah Stoke City an hmachhawn dawn a, zan dar 1:30-ah Manchester United-in Everton an lenchilh ve bawk ang. Nizan khan Arsenal leh Manchester City bakah Newcastle United leh Brentford an inkhel a, semifinal-ah Premier League club vek inhmachhawn theih dan a awm.

Spurs hian kum 2008 khan League Cup nomawi an chawi a, nomawi lian tham an chawi hnuhnun ber a ni. Argentine mana-ger Mauricio Pochettino hnuaiah record an nei ṭha a, Champions League final hial an thleng. Amaherawhchu Poch hian hun a mamawh a, Spurs thuneituten an nghak thei tawh lo. Nomawi chawi ṭhin manager Jose Mourinho an lalut a, Portuguese manager hian London club hi nomawi chawi thei tur khawpin an rilru a ti pau khauh tawhah a ngaih theih.

Mourinho hian Spurs hmaa a club enkawl Manchester United kha a chet ṭhatpui lo an ti nachungin Europa League leh League Cup a chawipui hman. Hei chauh hi a ni lo, Premier League leh FA Cup-ah pahnihna a nihpui bawk. Man United-in insiam-ṭhat duhin Mourinho aiah Ole Gunnar Solskjaer an lalut a, Norwegian manager hnuaiah nomawi an la chawi lo. Solskjaer hian a hna chan lo tawkin English club ropui hi a enkawl a, amaherawhchu kum a vei a, nomawi an chawi si loh chuan Old Trafford-a thuneihna fawng vuantu hi a ni reng thei lo.

Solskjaer-a hote hmachhawn tur hi Everton an ni a, Goodison Park-ah an khel dawn. Toffees manager Carlo Ancelotti hote hi tun hnaiah an che ṭha leh tawh a, match hnuhnung pathumah Chelsea, Leicester City leh Arsenal te an hneh. Manchester United nen an inkhelh hunah Italian manager Ancelotti hian an thiampuipa James Rodriguez a chhawr leh thei turah an ngai a, an tawh a khirh lehzual ang. November 7 khan Toffees-in Solskjaer-a hote an mikhual a, 3-1 in an hneh lo. Tun ṭumah hian phuba lak ngei an tum dawn a ni.