Pathianni tlai dar 2:30-ah India vs Pakistan

ICC Champions Trophy-ah India leh Pakistan te chu February 23, Pathianni hian Dubai International Stadium-ah an inhmachhawn dawn. Shaheens hi inelna thlengtu ni mah se Pakistan-ah India an zn duh miau loh avangin Mohammad Rizwan-a hoten 'home advantage' an nei dawn lo.

Inelnaah hian cricket khel ram pariat aṭangin team ṭha pariat chauh an tel a, Pakistan-in an match hmasa bera New Zealand an hneh loh avangin tla thei dinhmunah an ding der tawh. Shaheens hian India an hneh lo a, New Zealand-in Bangladesh an hneh chuan Pakistan hi an tla nghal ang.

Champion rinkai zinga mi India-in bowler chhuanvawr Jasprit Bumrah chhawr thei lo mah se Bangladesh lakah harsatna an tawk lo. Men in Blue hian wicket rukin ṭhenawm ram Bangladesh an sawp a, inelna ṭan hmaa khel fuh hlei thei lo captain Rohit Sharma pawhin 41 runs a siam.

Shubman Gill-a'n century (101) siamin Pakistan lakah pawh India inghahna tur a ni dawn a, chutihrualin inkhel boruak sangah chuan Bangladesh laka 22 runs lek siamtu Virat Kohli dah hniam theih a ni lo ang.

ODI match hnuhnung pangaah India-in tlawm an nei lo a, vawi li an chak a, ṭum khatah result a awm lo thung. An intawn hnuhnung ber chu October 14, 2023 kha niin ICC Cricket World Cup-ah India-in Pakistan hi wicket sarih zetin an sawp a, ball 117 an dah bang.

Group B lamah vawiin tlai dar 2:30 hian Australia leh England te an inkhel dawn a, cricket-a ram inhal tak pahnih inkhel hi a hmuhnawm khawp ang. Aussies hi ICC hnuaia inelna lian thamah an champion thei a, tun ṭumah erawh player inhiam an ngah avangin champion rinkai an ni pha lo thung.