Arsenal mualah West Ham

An intawn hnuhnung pahnihah Arsenal chuan West Ham lakah goal 11 an khung a, goal hnih chiah an chhuah - Premier League an inkhelhna pahnih hi London Stadium lamah a ni.

Zanin dar 8:30 hian Gunners chuan league match khel turin West Ham an mikhual dawn. Emirates Stadium bika an lenluh hnuhnung berah Hammers hi 2-0 in an chak thung.

Mikel Arteta-a'n tlarhma lam hi engtin nge a remkhawm ang tih chu zawhna lian tak a ni leh ang. An match hnuhnunga Leicester City an hneh ṭumin Leandro Trossard, Raheem Sterling leh Ethan Nwaneri te an intlar.

Mahse, a tawpa goal hnih khungtu chu bench aṭanga lut Mikel Merino a ni thung - Spanish midfielder hian zaninah bul a ṭan a nih pawhin a mak lo ang, hmatawng dangte an hliam karah mi mit fukna a ni dawn.

Kum 28 mi Merino hian Foxes lakah khan Kai Havertz-a mawhphurhna ṭhin ang kha a la a, ball kang a tauh luh bakah awmna tur hmun a thlan dik avangin goal a khung a ni.

West Ham tan pawh Merino ven dan zir a fin thlakin a rinawm. Real Sociedad tana goal khung thei angreng tak a nihna kha North London club pawh hian an beisei chhunzawm leh ang.

Merino hming a ri ring a, mual sir lama Bukayo Saka awm loh hliah khuhtu chu Nwaneri a ni, kum 17 mi chauh la ni mah se ball a thunun bakah a tlan pui thei em em a, ani hi zaninah pawh an innghahna a ni leh dawn a ni.

Gunners hian Premier League nomawi an beisei mek a, an chunga awm Liverpool nen an inkar tihzimna hun a nih theih avangin London Derby hi a pawimawh, point an hloh a nih erawh chuan an tan champion beiseina a zuih tawh hle ang.

Season kal laiah Arsenal hi League Cup leh FA Cup aṭangin an tla tawh - EPL leh Champions League te chu beisei an la neihna a ni.

Graham Potter-a enkawl West Ham hi an match hnuhnung pahniha chak lo an ni ve thung a, season an hman ṭhat loh avangin an dinhmun pawh a hniam - season thara English football inelna sang ber khel zel turin point an mamawh takzet a ni.