Europa League - Fenerbahce, Ajax leh Roma an tlang

Ningani zan khan Europa League knockout playoff second leg khelh a ni a, buaina chhuak avangin Fenerbahce leh Anderlecht te inkhel chu minute 15 ngawt chawlh lailawk a ngai hial - a hnuah khelh chhunzawm niin team pahnih te 2-2 in an inhnehtawk.

Lotto Park-a inkhelah Anderlecht tan Luis Vazquez chuan goal hnih a khung a, mikhual lam tan Youssef En-Nesyri leh Yusuf Akcicek te khung a ni thung a, inkhel pahnih belhkhawmah Fenerbahce hi 5-2 a chakin, Europa League last 16 an lut.

Fenerbahce manager Jose Mourinho chuan, "Ka naute khelh danah khan ka lawm hle, chutihrualin chawlhlawk lai khan kan chak tlang tawh emaw tiin an lo zai mai a, kha chu kan la tih loh tur thil a ni.

"Hamrik hnuhnung ber a rik hma chuan chak anga inngaih tur a la ni lo, second half-ah erawh kan khelh chhiat phah lo a, goal kan chhuah avang erawh chuan insiamṭhat ngaihna lai kan nei tihna a ni," tiin a sawi.

Inkhel dangah AS Roma chuan Paulo Dybala-a goal hnih hmangin Porto chu 3-2 in an hneh a, an intawn tawhna hmasa nena belhkhawmin Italian club hian 4-3 in hnehna an chang.

Roma coach Claudio Ranieri chuan, "Paulo Dybala kan nei hi kan vannei, ani hi mi ṭawng tam lo tak mai a ni a, a sawi chhun erawh a pawimawh hle ṭhin thung. Goal kan chhuah hian mi ṭhenkhat chu an chiai mai ṭhin, ani erawhin khelmual chhungah hotu nihna a tlin thei hle," tiin a sawi.

Inkhel dangah tun hma lama lo champion tawh Ajax pawh an tlang - Ningani zan inkhel bikah chuan Dutch club hi Union Saint-Gilloise lakah 2-1 in a chak lo, mahse an intawn hmasakah 2-0 a an lo chak tawh avangin Ajax hi 3-2 in an tlang.