Alcaraz hnehtu Jiri Lehecka

Infiamna huangah chuan chak chiang a sawi ngawt theih bik loh, seeded pakhatna Carlos Alcaraz chu Jiri Lehecka lakah a chak lo - Oatar Open khelh laiah quarterfinal paltlang zo loin a tla.

Ningani zan inkhelah world number 25 Jiri Lehecka hian 6-3, 3-6, 6-4 in hnehna a chang a, kumin atan bik Alcaraz hi vawi hnih a chak lohna a ni. Australian Open quarterfinal-ah tho khan Novak Djokovic hneh loin a lo tla tawh bawk.

Kum 21 mi Alcaraz chuan, "Ka team lam ka be pawp a, coach nen kan inbe bawk a, tun aia ṭha khan engtin nge ka khelh chhuah theih ang tih kha kan hre thei mai lo a ni. A nihna takah chuan match hautak lutuk lo tura ngaih kha a ni a.

"Mahse, kan rin lawk leh beisei ang vekin thil a thleng bik lo tih chu a takin kan hmu, ka khingpui khan a khel ṭhain hnehna chan phu zawk a ni tih kan pawm a ngai," tiin a sawi.

Spanish star Alcaraz hian set hnuhnung berah 4-2 in hma a hruai a, a khingpui service chhuhsak theihna remchang a nei bawk - mahse a chhawr ṭangkai thei lo, game lak belh tawh loin a tawp a ni.

Ningani zan inkhel dangah Andrey Rublev chuan a khingpuiin match point a hmuh tawh chu a inchhanhim hram a, seeded pahnihna Alex de Minaur chu 6-1, 3-6, 7-6 (8) in a hneh.

Russian tlangval Rublev hian Qatar Open semifinal hi vawi li a luhna chiah a ni a, kum 2020 khan a lo champion tawh bawk - kuminah hian nomawi chawi leh turin beiseina a nei sang hle.