Fimkhur taka awm hun a ni - Enrique

Paris Saint Germain manager Luis Enrique chuan an tan fimkhur taka awm hun a ni tih a sawi a, an match hnuhnungah goal khung tam mah se midang chunga leng an ni bik lo tih a sawi bawk.

PSG hian Champions League playoff an khelh zawh takah Brest chu 10-0 a hnehin an tlang, European football inelna sang bera an sawp tak hi anmahni ang thoa Ligue 1 club an ni a, an dinhmun a inthlau tih a chiang.

Spanish manager Enrique chuan, "Match ṭhenkhatah chuan goal kan khung hnem a, ṭhenkhatah erawh khung miah loa awm chang a awm, chuvangin vawi khat khelh ṭhat hluai hi kan nihna tak a ni lem lo tih hriat a ngai ve bawk.

"Champions League leh Ligue 1 boruak a danglam, match khata goal tam tak kan khung kha kan chhawm zel ngawt thei lo, tun kar tawpa match kan khelh turah pawh goal nei lo aṭangin bul kan ṭan dawn.

"Mi ten min fak a, thil lawmawm tak a ni. Amaherawhchu, min fakna hi ngaihṭha taka awm chhan tur a ni lo, fimkhur takin kan awm zawk tur a ni ang," tiin a sawi.

Ligue 1 hmahruaitu PSG hian Pathianni zan dar 1:15-ah Lyon an lenchilh dawn. League bikah chuan anmahni hnaih bertu Marseille aiin point 10 ngawtin an sang zawk a, an title kawl lai an hum leh theih ngei a rinawm a ni.