Tleirawl lakah Swiatek a chak lo

Dubai Tennis Championship khelh laiah champion tura rinkai Iga Swiatek a chak lo - quarterfinal inkhel hmuhnawm takah Swiatek hian Mirra Andreeva a ngam lo a, a zinkawng a tawp zui nghal.

Russian tleirawl Mirra Andreeva hi kum 17 mi chauh a la ni, tawnhriat a la ngah loin tun ṭumah pawh hian rinkai a ni lo. Mahse, nghet taka khel chhuakin world number 2 hi 6-3, 6-3 a hnehin semifinal a lut.

Seeded 12-na Andreeva tan WTA 1000 semifinal a khelh hmasak ber tur a ni dawn a, hetih lai hian Swiatek erawhin world number 1 Aryna Sabalenka hnung a zui, ranking sang pahnihin semifinal an lut phak lo.

Andreeva chuan, "Nikum khan Cincinnati Masters quarterfinal-ah kan lo intawng tawh a, a chak lo zawk ka ni. Kuminah quarterfinal match bawk kan khel dun leh a, mak tak maiin a vannei zawkah ka ṭang.

"Inkhelh hma aṭangin a rukin ka infuih char char a, chak thei ka ni tih kha ka rilruin a pawm thlap a ngai. A taka ka chantir thei hi ka lawm," tiin a sawi. A match lehpekah chuan Elena Rybakina a hmachhawn dawn a ni.