Kane dinhmun a chiang lo

Bayern Munich chuan Pathianni zan dar 10:00 hian Bundesliga match khel turin Eintracht Frankfurt an mikhual dawn a, an striker ṭha Harry Kane chu a inlan thei dawn em, tih a chiang lo.

England captain Kane hi Celtic nen Champions League playoff an khelh ṭumin a inhliam a, forward Kingsley Coman chuan a rawn thlak - tunkar tir lam kha chuan team training a zawm thei lo a ni.

Bavarians manager Vincent Kompany chuan, "Harry inhliam kha a pawi, mahse engtiang chena rei nge a chawlh dawn ka sawi thei lo," tiin a sawi a, a player pawimawh dinhmun hi chiang takin a sawi duh rih lo.

Tottenham striker hlui Kane hian tun season kal laiah Bayern Munich tan inelna hrang hrangah match 31 a khelh aṭangin goal 29 a khung a, a ṭhiante khung tur vawi 10 a siamsak bawk, goal 39 ngawt a thawk chhuak tawh tihna a ni.

Champion duh vangin Bayern Munich a zawm a, season hmasa kha chuan a hlawhtling rih lo - tun season erawh chu Bundesliga nomawi chawi turin an dinhmun a ṭha chho hle a, chesual loa dinngheh an tum ang.