Yann Sommer-a kut a hliam

Inter Milan goalkeeper Yann Sommer chu a kut zungpui dinglam ruh a tliak a, tun kar tawpah a inkhel thei dawn lo - Italian cub chuan an chhawr theih loh chin tur erawh an la sawi chiang thei lo thung a ni.

Serie A champion Inter chuan thuchhuah siamin, "Yann Sommer-a kutzungpui hliam endik a ni a, a dam leh thuai theih nan enkawlna kalpui nghal a ni," tiin an sawi a, tawnhriat nei ṭha a hliam hi chânna a ni thei dawn.

Inter Milan hian zanin dar 1:15 hian Serie A match khel turin Genoa an mikhual dawn a, hemi hunah hian kum 36 mi Sommer hi a inlan thei dawn lo. Italian chanchinbute chuan March thlatira Napoli leh Inter inkhelh hunah pawh a la inlan thei dawn lo niin a sawi.

Swiss goalkeeper a inkhelh theih loh takah chuan Josep Martinez a inlan thung ang - Spanish goalkeeper hian nikum khan Genoa aṭangin Inter hi a zawm a, nikum December thlaa Udinese nen Italian Cup an khelh ṭum khan inlanin goal a chhuah lo.

Simone Inzaghi enkawl Inter Milan hian Serie A nomawi an kawl lai chun humhim ngei an tum a, thil awlsam erawh a ni dawn lo - Naples club nen na takin an inchuh zui dawn a ni.

Antonio Conte enkawl Napoli chuan Pathianni zan tir dar 5:00-ah kai thar Como an hmachhawn ve thung dawn a ni.