Hamilton hian engkim a nei - Hamilton

Lewis Hamilton chuan a team thar Ferrari a dah sang thiam hle a, car intlansiakna sang ber Formula 1 champion an nih theihna turin Ferrari chuan engkim a nei tih a sawi.

Mercedes chhuah-sanin Hamilton hian Ferrari a zawm a, tunlai driver ṭha zinga mi Charles Leclerc nen an inkawp dawn a, team dang tan chuan elpui hautak an ni dawn tih a chiang.

Formula 1 champion vawi sarih ni tawh Hamilton chuan, "Tlan chhinna kan nei a, engkim mai kha a fuh em em vek. Keimah chauh ka ni lo, teammate ṭha tak ka nei bawk, ka hmu dan chuan kan team hian a sang ber thleng thei turin engkim kan nei.

"Tawnhriat nei ṭha tak tak awmkhawm kan ni a, a hma lama ka sawi tawh ang khan Ferrari ka zawm chinah hian ni tin mai hi ka tan a nuamin a hlu em em vek, a tira ka beisei ang khan a dik chho vek," tiin a sawi.

Britain tlangval hian Michael Schumacher-a nen record inṭawm an neih, world champion vawi sarih nihna chu kalsan a tum a, tun season thar lo awm tur hi a tan chona lian leh hautak a ni ang.