MPL champion khelh hun a thleng ta Aizawl FC Vs Zo United

Mizoram chhung club inelna liana nomawi kawl vektu Aizawl FC-in zanin dar 7:00 hian Lammualah Zo United an hmachhawn dawn.

Mizoram Premier League champion lai AFC hian Durand Cup an khelh avangin Chanmari FC leh Ramhlun North nena an inkhelh hun sawn a ni a, Round 3
aṭangin K. Malsawmkima hote an inlan ṭan dawn tihna a ni.

Bright a êng

Aizawl FC-in season thar atana an foreigner lakluh chu Bright Middleton Mends a ni a, Ghanaian forward hian India ramah tawnhriat a la neih loh avangin MPL club hian risk an la. I Day Football-ah Mends-a'n group stage-ah goal khat chauh a khung avangin sawisel a hlawh hman a, amaherawhchu semifinal leh final-a Shillong Lajong leh Ramhlun North an hneh ṭumin goal pawimawh a khung ve ve.

MFA Super Cup-ah Mends hian Bungkawn FC lakah goal hnih a khung nghal a, an champion thlengin goal a khung tawh lo. Inelna pahniha match 10-a goal nga a khung chungin Ghanaian forward hian tualchhung football ngainatute mit a tlung tawk lo.

Durand Cup-ah erawh Aizawl FC tan Bright Mends hian ênna a thlen a, match ngaah goal ruk tehmeuh a khung. Ghanaian forward hian Lammualah Mizo player-te aiin a tlan chak zawk tih a lantir tawh a, Delhi lamah goal a khung thei tih a lantir tawh bawk. MPL5-ah forward che
ṭha fal an la awm lo a, hei vang hian Aizawl FC forward Mends hi MPL a khelh hmasak berah en bik a hlawh ang.

Zo United coach Vanlalrova chuan, "Mends hi player
ṭha tak a ni a, uluk takin kan veng dawn. Kan defender-te'n Ghanaian forward lakah fiah an cho a, Malsawma Chhangte pawhin a inrintawk thu min hrilh," tiin AFC foreign striker laka an zam loh thu a sawi.

Entin zel?

Mends-a'n Delhi-ah goal khung tam mah se Aizawl FC erawhin nomawi an hawn thei lo. Semifinal-ah rinkai zawk ni chungin AFC hi Army Green lakah penalty hmangin an vanduai a, Durand Cup-ah an beisei ang result an hmu lo.

MPL club hian nuai 45 hlawh theihnaah nuai nga chiah an la a, zanin inkhel turah pawh a
ṭha zawngin emaw a chhe zawngin emaw nghawng a nei thei ang.

Hei erawh hriat a ṭha, Ai-zawl FC-in season ṭan tirha Chan-mari FC an hneh loh hnu-ah Lammualah match kaw chhung a zawnin an chak leh tawh. India ram pum huapa an result a ṭha tawk lo a nih pawhin Mizoram chhungah bikah tun dinhmunah anni aia record nei ṭha club an awm lo.

Zo United lam

Vanlalrova hoten Bethlehem Vengthlang FC hneh loin bul
ṭan mah se an match hnuhnung berah Chhinga Veng phur vanglai tak tidaiin point khat a hlawh chhuak. Zo United hian loan hmanga Chhanrinpianga an lakluh bawk avangin Aizawl FC hmachhawn tur hian an inrintawk khawp ang.

Zo United coach Rova chuan, "Aizawl FC hi chak lo a rawn haw an ni a, training pawh an duh angin an la nei thei lo. Team ṭha tak an ni nachungin tun hi hneh theihna hun ṭha a ni a, point thum hlawh chhuak thei dinhmunah kan ding. Kan player-ten chak an duh avangin an thawkrim a, point khat chauh kan la hmuh avangin kan tan chuan inkhel pawimawh a ni," tiin Vanglaini palai a hrilh.

Inkhel nghawng

Aizawl FC hian Durand Cup vanga MPL ṭantirh lama an inlan loh avangin ni 19 chhungin match ruk an khelh a ṭul dawn a, zanina result ṭha an hlawh chhuak lo a nih chuan AFC tan an hmabak kawng khirh tak harsatna belhchhahtu a ni ang.

Zo United lamin ṭantu nei tam lo mah se Lily Veng Cultural Club nen an inthlunzawm avangin an fan neih angte thawm a ṭha ṭhin hle.

Aizawl FC hian MFA Super Cup leh I Day Football final aṭanga thlir chuan ṭantu an nei ṭha - MPL5-ah ṭantu an nei dawn em? MPL-ah team bakah an supporter fiahin an awm tel dawn.