India ropuina Jhajharia

Rio 2016 Paralympics neih mekah India tan Devendra Jhajharia chuan nimin khan mipa fei khawh (javelin throw F46) -ah gold medal a dawng. Jhajharia hian Olympic Stadium-ah gold medal dawng tur hian 63.97m zet a thui a khawh a, hei hi world record thar a ni bawk.

Kum 35-a upa Jhajharia bakah hian India tan Rinku Hooda leh Sundar Singh Gurjar te an inlan bawk a, Rinku hian a mimal a chetṭhat ber ṭum tawngin 54.39m zeta thui khawh mah se parukna bak a ni lo thung a, Gurjar erawh final round a in lan phak lo.

Jhajharia hi Churu, Rajasthan-a piang niin kum riat mi a nih laiin thingkungah a lawn a, electric hrui khawih palhin a ban veilam chu a kiu bulah tan a ngaih phah. Rual a ban lohna hian infiamna lama a ropuina tur a dal zo chuang lo. Kum 2004 Summer Paralympics, Athens-ah khan fei khawhah hian pakhatna lo ni tawhin India tan Paralympic-a gold medal la thei hmasa ber a lo ni tawh.

Paralympic bakah hian World Championship-ah gold leh silver medal a lo la tawh. A sulhnu ropui tak avang hian kum 2004 khan Arjuna award hlan a ni tawh a, kum 2012 khan Padma Shri pawh hlan a lo ni tawh bawk.

Rio Paralympic-ah hian nimin thleng khan India hian gold pahnih, silver leh bronze pakhat ve ve an la tawh. Tun
ṭumah hian India hian infiammi 19 a tir a ni.