Tu nge Barca dang thei ang?

Celtic manager Brendan Rodgers-a'n Nou Camp-a Barcelona an lenchilh hmain player ropui chu eng ang pawhin an khingpui ten dan tum mah se hmun awl an insiam thei zel a ni, tiin an khingpui tur Barcelona chungchang a sawi a - Thawhlehni zanah a thusawi dikna a lang nghal.

Nou Camp-ah dawl zawrin Celtic an zawr a, Barcelona chuan 7-0 in an sawp. Khawvela footballer ṭha ber Lionel Messi-a'n Champions League-a a hattrick vawi rukna a siam a, Luis Suarez chuan goal hnih khungin Neymar leh Andres Iniesta ten goal khat ve ve an khung bawk.

Messi-a'n minute 3-na leka goal hmahruai a khung hnuah Celtic rawlthar duhawm Moussa Dembele chuan penalty a hlawh chhuak a, Rangers laka hattrick siam zo hlim forward hian amah laka foul Barca keeper Marc-Andre ter Stegen a hrem thei lo - a bak zawng hi chu Bar­celona channa a ni.

Goal 266

Nou Camp-a season hnih an hman ho hnuah Messi, Neymar leh Suarez ten goal 253 khungin assist 120 an nei a, season
ṭan a nih ruala goal khung an chhunzawm leh nghal avangin MSN goal khung zat hi 266-ah kai chhoin 128 assist an nei tling ta!

Messi-a'n Neymar nen duhtawka Celtic tlar hnung an chaih phar hnuah an goal hnihna a khung a, Suarez-a goal khungte striker naran tana tih chi a ni lo a, Neymar-a'n freekick aṭanga goal a khung bakah assist vawi li a nei bawk.

Thukhawchang

Celtic manager Brendan Rodgers chuan, "Goal sarih kan chhuah avanga zak tur kan niin ka hre lo. Barca hian keini aia ṭha zawk team lakah khatiang taka ropui khan an khel fo tawh a ni. Messi, Suarez leh Neymar dang tur hi chuan eng anga player tam pawh remkhawm ila, an thuhnuaiah an dah zel ang," tiin an khingpui team a dah sang hle.

Barcelona manager Luis Enrique chuan, "First half-ah penalty kan chawi tih loh chu tihsual kan nei lo a, tihsual kan neihchhunah pawh kan insiamṭha nghal a ni. Keimahni mai bakah fan-te pawn nuam an ti a, Champions League bul ṭan dan ṭha tak a ni," a ti.

Enrique chuan hattrick siamtu Messi fak nghalin, "Messi hi chu a duhna apianga khel turin zalenna pek a ni a, number eight a ni emaw 10-ah pawh khel se, khawvela ṭha ber a ni zel a ni. A goal khung zat leh football a man dan em em hi en ula, amah hi football chu a ni," tiin a player chu a fak hle.

Thawhlehni zan Group C inkhel tur dangah Manchester City leh Borussia Monchengladbach chu thlipui leh ruahpui vangin an inkhel thei lo a, nizan khan an khelh hun tur hi sawn niin he chanchin buatsaih a nih lai hian an result kan hre hman lo.