Tlai dar 2:30-ah Aizawl West Derby
Chanmari West FC-in Mizo-ram Premier League Season 5-ah point an la hmu lo, Dinthar FC-in point khat chiah an la hlawh chhuak. MPL-a point hmuh harsatzia hre chin chuan vawiin tlaia point thum hlut zia an hre tel ang, team riat awmna pawh ni se semi final beisei tur tan chuan result ṭha neih a hun tawh.
Lianzama hun?
Chanmari West coach HC Zarzoliana chuan H. Lal-lian-zama'n inkhel bul a ṭan dawn tih Vanglaini palai a hrilh. Lunglei Zobawk tlangval hian MPL khelh tawhah goal khung lohna season a la nei lo a, Mizoram league sang bera goal a khung tawh zat hi goal riat a ni.
West Warrior-in field sirah Laldampuia leh R. Laldanmawia te an kawl a, winger ṭha pahnih hi team thahrui tih hmuh hmaih theih an ni lo a, chutihrualin a hmawr bawktu atan Lianzama hi mamawh chhanna a ni thei ang em tih chu vawiin tlai hian a chiang ang. Chhinga Veng leh Bethlehem VT an hneh loh ṭumin Zo United (Reitlang FC) striker hlui hi bench aṭangin a lut ve ve a, tun season minute 44 chhung khelmuala hun a hman tawhah goal a la khung lo.
Dinthar tan Samuel
Dinthar coach K. Lalrin-tluanga (Saitea) chuan, "Kan club-ah hian tualchhung football hrechiang an kat nuk a, season liam ta pawh khan Dinthar FC hi team chhe ber tura ngaih kan ni. Amaherawhchu kan chhiat ber lai pawhin Pathian kaihhruaina zarah kan indinthar zel ang," tiin Vanglaini palai a hrilh a, club danga anga an budget a san loh avangin an thawhrim a ṭul tih a sawi lang bawk.
MPL4-ah khan Dinthar FC hi pangana a ni a, head to head-a Zo United an tluk loh vang chauhin semifinal an khel lo. Season liam taa mipui beiseia aia ṭhaa result an neih chhanah captain Samuel Laltlanthanga a pawimawh hle. Dinthar tlangval hian goal riat a khung a, nikuma Aizawl FC lama hattrick siam thei striker hi a theihna a san avangin a mawphurhna a sang.
MPL1 champion tana thu lawmawm chu Michael Lalrem-ruata'n Chanmari FC an draw
ṭumin goal a khung a, Aizawl FC striker hlui hian a chetṭhat a chhawmnun a ngai. Hei chauh hi a ni lo, Chanmari lama hrem vanga khel thei lo Lalruatpuia a rawn kir tawh dawn bawk.
Eng nge an sawi?
Dinthar FC coach Saitea chuan, "Chanmari West hi an talbuai vanglai tak a ni a, kan vanneih rualin tawh an khirh khawp ang. Coach ṭha tak leh player hrawl tak tak kawl an nia fimkhur taka kan khelh a ngai dawn a ni," tiin chak chiangah a inngai lo.
Chanmari West coach HC Zar-zoliana chuan, "Point kan la hmuh loh avangin pressure kan neih phah lo a, player-te erawh an thawhrim phah zawk. Chak turin theihtawp kan chhuah ang," tiin point hloh a thiang tawh loh thu a sawi.