Europa League Netherlands-a zinkawng tan tur United
Zanin dar 10:30-ah Europa League khelh ṭan a ni dawn a, nipui transfer bazar-a thawm nei na tak Manchester United chuan khualmualah Feyenoord an lenchilh dawn.
Europe club lian, Champions League-a inlan phak lo zingah Fenerbahce, Roma, Ajax leh Inter Milan an inlan dawn bawk a, English club zingah Southampton chuan Czech club ṭha Sparta Prague an mikhual bawk ang.
Sulhnu hmun hlui
Manchester United-in sea-son hmasaah Champions League an khel a, an match hmasa berah Dutch club ṭha PSV Eindhoven chu 2-1 in an ngam lo a, defender Luke Shaw chu ke ruh tliak vangin an chan bawk.
Kumina United-in an Europe zinkawng an ṭanna tur chu Dutch club tho an ni a, Feyenoord khelmualah season hmasaa an bul ṭan dan duhawm lo theihnghilh an duh ang.
Manchester Derby-a chak lo hlim Jose Mourinho-a'n Foot-ball Association chuan fixture an siam danah Europe-a inlan club-te an duhsak lo niin a sawi a, Pathianni tlai dar 4:30 hian United-in Watford an lenchilh lehnghal dawn.
Premier League champion duh Portuguese manager hian Europa aiah league a ngaih pawimawh zawk dawn miau avangin zaninah player inlan tam lo zawk a chhawr a rinawm a, rawlthar duhawm Marcus Rashford chu tlarhmaah maltlat tura beisei a ni.
Team ṭha Feyenoord
Dutch club Feyenoord-in tun season an hmang ṭha tak zet a, league match nga chhung chu a zawnin an chak tawh. An match hnuhnung pangaa pali zingah hian goal hnih aia tlem lo an khung ziah a, match ngaah goal 15 khung tawhin goal hnih chiah an chhuah thung.
Barcelona player hlui Gio-vanni van Bronckhorst enkawlna hnuaia khel mek Feyenoord hian tlarhmaah tawnhriat ngah tawh Dirk Kuyt an nei a, season hmasaa inelna hrang hranga goal 23 khungtu striker hian tun season-a match ruk a inlanah goal thum a khung leh der tawh.
Liverpool striker hlui, March 2011-a Reds tana a hattrick hmasa ber Manchester United lama khungtu striker hi kum 36 laia upa ni tawh mah se a thiam a la theihnghilh loh avangin United tlarhnung tan ven uluk a ṭul ang.
Italian club inlan zan
Serie A club langsar sawi a nih apiangin Roma leh Inter Milan sawi hmaih an ni ngai lo a, club pahnih hian zaninah Europa League-a an match hmasa ber an khel dawn.
Roma hian Czech club Vik-toria Plzen chu khualmualah an lenchilh dawn a, Luciano Spalletti-a enkawl team hi Champions League playoff round-a Porto an hneh loh vanga Europa League khel tur niin an mualpho thaireh nan Europe-a club inelna ngaihhlut ber dawttuah hian champion ngei an duhin a rinawm.
Inter Milan-in tun season-a an match hmasa pahnihah hnehna an chan zawh loh hnuin Pescara khelmualah hnehna an chang ve ta a, Frank de Boer-a enkawlna hnuaia insiamṭhat tum mek club hian inrintawkna nasa tak nen Israeli club ṭha Hapoel Be'er Sheva an mikhual ang.
Fenerbahce & Ajax
Turkish club ṭha Fenerbahce chuan khualmualah Ukrainian club Zory an lenchilh dawn a, league match thum an khelh tawha hnehna la chang zo lo Turkish club tan Ukrainian league match sarih an khelh tawha vawi li chak tawh club hi zuam chi an ni dawn lo.
Hetihrual hian Fenerbahce hian Manchester United striker hlui Robin van Persie an la kawl miau avangin zuam chi erawh an ni dawn lo. Kum 33-a upa striker hian season hman zawh takah khan duhthusamin season a hmang lo an ti chungin goal 22 a la khung thei tlat!
Dutch club ropui an sawi apianga an sawi tel ṭhin Ajax-in Greece club ṭha Panathinaikos an lenchilh dawn a, Champions League playoff-a FC Rostov an hneh loh avanga Europe-a club inelna sang ber khel phak lo Ajax hi khualmualah hnehna chan beisei ngam tur khawpin an ṭha tawk.
Saints tan insiamṭhat hun
Southampton-in season hmasaa an player pawimawh Sadio Mane leh Graziano Pelle an chan hnuah an coach Ronald Koeman chu Everton lakah an chan bawk a, tun season-a competitive match li an khelh tawhah hnehna an la chang zo lo.
Europa League group stage-a an vawi khat inlanna turah Saints-in insiamṭhatna remchang an nei dawn a, an khelmualah Sparta Prague an mikhual dawn - Czech club hian English club an hmachhawn tawh vawi 14-ah hnehna an la chang miah lo a ni.