Basketball-a China hnehtu India

FIBA Asia Challenge khelh mekah India chuan second round-ah Asian powerhouse tia sawi ṭhin China chu 70-64 a hnehin quarterfinal lut turin an dinhmun a ṭha ta hle.

Tehran-a inkhelah Mizoram Super League lama a hmel kan hmuh tawh guard Vishesh Bhrig-uvanshi chuan India tan point 15 score in a thawh hlawk hle a, Khatla TBL tana khel tawh Vishesh bakah hian captain Amritpal Singh (23 points) leh Amjyot Singh (16 points) te chu India chakna hnar pawimawh an ni.

Tun dinhmunah India hi world ranking-ah 53-na niin China hi 14-na an ni thung. India hian an match lehpekah Kazakhstan an hneh a nih chuan quarterfinal an lut ang.

Ram leh ram basketball hmanga inelna 2016 FIBA Asia Challenge-ah hian ram 12 an inel a, he inelna hi 2017 FIBA Asia Cup khel tur zawnna a ni pah nghal bawk.