Sharapova dinhmun chiang dawn

Grand Slam vawi nga champion tawh Maria Sharapova-i'n hrem a tawh chung chang a khin letna chu October thla chawlhkar hmasa berah thutlukna siam a ni dawn.

Kum 29-a upa Sharapova hian kumin January thla aṭanga infiam-mite tana hman phal loh zianga telh 'meldonium' chu Australian Open-ah khan a lo hmang tih hmuh chhuah a ni. International Tennis Federation chuan Russia nula hi kum hnih chhung inkhel thei lo turin a hrem mek.

Sharapova hian infiamna lama thubuai ngaihtuahtu sang ber Court of Arbitration for Sport (CAS) hnenah hrem a nihna hi a khing let a, CAS hian September thla laihawl hian an thutlukna an puan hman neisei mah se October thla an kai dawn ta zawk a ni.

Hremna hi kaltlang pui a nih chuan January 25, 2018 thleng a awh dawn a, hetiang a nih chuan Grand Slam pariat a khel dawn lo tihna a nih bakah kum 31-a upa a lo ni tawh dawn a, a tan court chhungah tunhma anga inlan a harsa tawh ang - hremna hi an ti nep a nih erawh chuan rei tak a chawlh a ngai lo mai thei bawk.