Mohun Bagan leh SRK an indawr

Sum lama talbuai mek Mohun Bagan-in neitu thar an nei dawn hnai a, Kolkata club lian neitu nih tuma hming langsar zingah Bollywood actor lar Shah Rukh Khan hming lamrik a ni.

Mohun Bagan hotu zinga mi, a hming tarlan loh chuan, "Mi engemaw zatin Mariners lei duhin min dawr a, inbiakna kalpui mek a nih avangin hming tarlan theih a ni lo," tiin sawi mah se phai thuthar thehdarhtute chuan Shah Rukh Khan chu kum 123-a upa club hnimhnai bertu niin an tarlang.

SRK-a production house Red Chillies Enter-tainment chief executive officer Venkatesh S. My-sore chuan Mohun Bagan finance secretary Debashish Dutta leh Mohun Bagan assistant general secretary Srinjoy Bose te chu vawi tam a titi pui tawh niin an tarlang bawk.

Indian Premier League club Kolkata Knight Riders neitu Shah Rukh Khan hian Indian Super League ṭan a nih dawn khan club neih tumin hma a lo la tawh a, Kolkata khawpuia innghat tur club a chan theih tak lohah chuan inhnukdawkin football club a nei dawn a nih chuan Kolkata ami ngei a duh thu a sawi.

Shah Rukh Khan hian khawvela lemchan thiam zingah hausak lamah pahnihna dinhmun a hauh mek a, a sum neih ngah zawng hi dollar maktaduai 600 chuang a nih avangin Mohun Bagan a lei thei a nih chuan Kolkata club sum bawm a khat sawt ang.