Tokyo 2020 beiseitu Chong Wei

World number 1 Lee Chong Wei chuan Badminton World Federation's (BWF) in kalphung thar a nei a nih chuan Tokyo Olympic 2020-ah inlan theih a la beisei thu a sawi.

Malaysian shuttler hi tunah kum 33-a upa a ni tawh a, Olympic hnu hnung pathum Beijing, London leh Rio-ah te khan mipa singles final lut vekin a chak lo zawkah a ṭang vek thung.

Tunah hian BWF hnuaia badminton inelnaah hian best of three hmanga chak zawk zawn a ni a, game point chu 21 a ni. Point 20 ve ve an hmu a nih chuan point hnih hmu zawn hmasain game a la ṭhin.

BWF chuan tunah hian kalphung thar tur a ruahman a, best of five hmanga chak zawk zawn tur niin game point atan 11 chauh a ni tawh thung ang - he kalphung hi an hmang ngei dawn em tih a la chiang lo thung.

Chong Wei chuan, "Thil chiang engmah la awm lo mah se dan thar an hmang a nih chuan Tokyo Olympic 2020-ah ka la inlan theih ka beisei. Lin Dan pawh a la inlan duh hial ka ring," tiin a sawi.

Chinese shuttler ropui Lin Dan pawh tunah hian kum 32-a upa a ni tawh a, world champion vawi nga ni tawh leh Olympic champion ṭum hnih ni tawh hi tuna BWF kalphung ang chuan Olympic lehpekah a inlan a beisei awm tawh lo thung.

Chang Wei chuan sawi chhun-zawmin, "Game point atan 11 a nih chuan Lin Dan pawh Olympic lehpekah a inlan leh ka ring. A chhan chu keini ang senior player tan chuan hun rei lo zawk inkhelh hi a ṭha tawh a, kawng tam takah a ṭangkai zawk," tiin a sawi.