Arsenal tan Sanchez-a'n point hlawh chhuak

Alexis Sanchez-a goal khung hmangin Arsenal-in Champions League-a an group match hmasa berah Paris St-Germain lakah point khat an hlawh chhuak. Group A inkhel dangah Basel leh Ludogorets te 1-1 in an inhnehtawk ve bawk.

Parc des Princes-a inkhelah mualneitu PSG-in inkhel ṭan
aṭanga second 42-na leka Edin-son Cavani goal hmangin hma an hruai a, Gunners tan minute 77-naah Copa America best player Sanchez chuan sutin 1-1 in an inhenhtawk a, hun tawp hma chiahin Olivier Giroud leh Marco Verratti te hnawhchhuah an ni.

Tlarhnung pawp

Arsene Wenger-a'n tlar-hnung laiah Valencia aṭanga a lakluh hlim Shkodran Mustafi leh Laurent Koscielny te a inkawptir. Europe football thiam ram Germany leh France defender-te hi inkhel ṭan tirhah an muthlu. PSG right back Serge Aurier ball vawrh chu vengtu nei lo Cavani chuan chiang zetin a tauh lut - Gunners keeper David Ospina a che hman lo chiang hle.

Premier League pahnihna Arsenal-in insiamṭhat nghal tum mah se an tho chhuak thei mai lo. PSG bawk an hlauh-awm hmasa leh; Uruguay international Cavani-a'n goal ruak a khung ṭheih bakah winger Angel di Maria leh Serge Aurier te goal khung tur chu Ospina-a'n ṭha takin a dan sak - Colombia international hian Petr Cech ai a awh zo hle.

Tlarhma buai?

Arsenal midfield an khawng tawk lo a, Santi Cazorla, Alex Oxlade-Chamberlain, Mesut Ozil leh Alex Iwobi ten ball inpe kual ngial ṭhin mah se a hmawr an bawk fuh thei lo. Striker pangngai Giroud leh Lucas Perez te bench-ah dah an ni a, tlarhma laia awm Sanchez-a'n tharum a ngah tawk loh avangin PSG tlarhnung an dingkhawng thei viau. Minute 63-naah Giroud chuan Cham-berlain rawn thlakin Arsenal goal nawr a nat phah sawt a, forward Iwobi-a ball pet chu PSG keeper Alphonse Areola chuan lo dang mah se ball lo kal let hi Sanchez-a'n chiang zetin a pet lut.

North London club hi an chak loh ni pawha ball chang tam leh inpe kual hnem ṭhin an ni. PSG lakah erawh ball possession hniam zawk niin 48% an nei a, goal khung tumin vawi 10 pet mah se goal zawnah ṭum thum chauh an pet thei. Hetihlai hian heti zawng hian a ngaihtuah theih thung - Gunners tan an group-a team hmachhawn hautak ber tur nia ngaih khelmuala point khat hmuh hi result chhia a ni lo ang.

Emery hi...

Qatar sumdawng hausain Champions League nomawi an duh avangin season hnih chhunga cup paruk chawi thei Laurent Blanc banin nipui lai khan a zawna Europa League nomawi vawi thum chawi thei Spanish manager Unai Emery an lalut.

Sevilla coach hlui hnuaiah PSG-in beisei an phak rih lo a, league-ah match li an khelh aṭangin table-ah palina an la nih avangin season hmasaa point 31 zeta sangfal chunga an champion ang kha an tawng phak tawhin a rinawm loh. Club neituten an duh ber Champions League-ah fiahin an awm chho dawn a, an match hmasa ber
aṭanga thlir chuan hmasawnna tur an la ngah tih a chiang.

Eng nge an sawi?

Arsenal manager Wenger chuan, "Ṭha taka bulṭan duh mah ila min rawn barakhaih nghal a, a tir lam minute 20 chhung kha chu kan buai takzet a ni. Bul ṭan ṭha zawk an nih avangin kan tho leh thei kha ka lawm a, point khat kha kan tan a hlu," tiin a sawi.

Wenger chuan a pla-yer chung--chang sawi chhun-zawmin, "Alexis Sanchez khan a khel ṭha hl e a, a goal khung pawh kha awmna tur hmun dika a awm vang a ni. Giroud-a'n red card a hmuh chungchangah tih dik loh a neih loh thu min hrilh tawh a, a thu sawi ka ring tawk," tiin a sawi.

PSG manager Emery chuan, "Ka nauten ka duhdan takin an khel chhuak thei a, vawi sarih zet goal khung theihna hun kan neih avangin goal chu kan la khung em em ang tih ka chiang. Tun anga kan khel thei zel a nih chuan hnehna chu kan la chang dawn, vawiina kan result pawh hi a chhe hran lo," tiin a sawi.

Inkhel dang

Group A inkhel dangah Basel leh an mikhual Ludogorets te 1-1 in an inhenhtawk ve bawk. Bulgarian champion Ludogorets tan minute 45-naa forward Jonathan Cafu goal khung chu Swiss club hian minute 80-naah midfielder Renato Steffen hmangin an sut hram a ni.

Basel hi Swiss club zinga Cham-pions League-a season ruk inlan thei hmasa ber an ni a, an khingpui Ludogorets pawh hi an rama season khat chhunga nomawi pathum chawi thei an nih avangin an group hi an intum tawk hlawm hlein a rinawm.

Ngaihnawm

• PSG hian an khelmuala Euro-pean match an khelh vawi 40-ah vawi khat chiah chak loh an nei. Vawi 25 chakin
ṭum 14 an inhnehtawkpui.

• Olivier Giroud hi season hma-sa pawh khan Champions Lea-gue-a a match hmasa berah hnawh-chhuah a lo ni tawh bawk.

• Alexis Sanchez hian Arsenal tana Champions League a khelh hnuhnung 14-ah goal li khungin a ṭhiante khung tur vawi nga a siamsak bawk.

• Arsenal hi season thum chhung chu Champions League a an match hmasa ber-ah an chak zo lo vek.

• Edinson Cavani goal khung (42 second) kha Arsenal-in Champions League a an goal chhuah ran ber a ni.

• Arsenal hian khualmualah Eu-ropean competition-a bik French club an hmachhawn hnu--hnung 13-ah chak loh an nei lo.