Fan rinawm nghilh lotu SV Darmstadt 98

Bundesliga club SV Darmstadt 98 chuan cancer vanga thi an fan ruhkawl Jonathan Heimes hriatreng nan an stadium hming an thlak a, 'Merck-Stadion am Boellenfalltor' tia hriat
ṭhin an khelmual chu tun season chhung atan Jonathan-Heimes Stadion am Boellenfalltor tih a ni.

Season hman zawh taka Bundesliga-a 14-na dinhmun luahtu Darmstadt president Rudiger Fritsch chuan, "Darm-stadt hlawhtlinna kawngah Jonathan Heimes khan tha a thawh hnem em em a, damlo chau tak nichung khan he club hi chakna nasa tak a pe a ni," tiin kum 26 leka upa nichunga thi ta an fan chungchang a sawi.

I thi lo Johnny

Khawvel mi tam zawk hi chu lei hnuaia zalh kan nih ruala theihnghilh mai tur, lei taksa a luanral ruala hming luangral tur kan ni - mahse, March 8-a thi Jonathan Heimes erawh a thih hnuah a chanchinin sawi a hlawh dawn chauh a, a taksa dai tawh mah se a hming erawh a la dai lo.

Darmstadt captain Aytac Sulu chuan, "Tunah chuan Johnny-a in chhunga khel ang mai kan ni dawn a, hei hian player-te phurna nasa tak min siamsak dawn a ni. Bundesliga khel zel turin theihtawp kan chhuah dawn a, Johnny vang hian tun hma zawng aiin kan phur lehzual ang. He club ngainatu te chuan Johnny kha an ngaina vek a ni," a ti.

Bundesliga club-in an stadium hming an thlak theihna kawnga pawimawh tak chu stadium sponsor-tu technology compoany lian Merck an ni a, Merck board member Kai Beckmann chuan, "Stadium hming thlak a nih theihna tura thuneitute kan inlungrual em em vek mai hi a lawmawm lai chu a ni," tiin Johnny-a chuan an thinlung a hneh vek thu a sawi.

A la tawp lo

Kum 14 leka upa a nih laia cancer natnain a tlakbuak Heimes hian amah ang thoa cancer natna vei naupangte ṭanpui turin tennis player lar Andrea Petkovic nen DUMUSSTKÄMPFEN foundation chu February 2015 khan an din a, he NGO hming awmzia 'A tawp thlengin bei rawh" tih hi Darmstadt player-te fuih phur ṭhintu a ni a, Bundesliga khel tura an inpetkaina kawngah a pawimawh hle niin an sawi!

Johnny hian ṭawngkam hman lar tak pakhat a nei bawk a, chu chu , “Es ist noch nichts verloren” (Engmah i la hloh lo) tih niin a hunlaia Darmstadt midfielder Tobias Kempe phei chuan a kutah tattoo-in a chhu kai hial a, club player-ten he ṭawngkam hi infuih phur nan an hmang ṭhin. 2015-16 season-a Bundesliga khel tura an inpetkai khan Darmstadt hian Heimes hi khualzahawm atan an hmang nghe nghe.

A kal zel dawn

Darmstadt main sponsor Software AG an ngawi mai mai bik lo. Nakkum March-a Jonathan Heimes thih cham a thlen hunah club player-te chuan company logo aiah Johnny-a foundation DUMUSSTKÄMPFEN logo chuanna jersey an ha ang a, jersey hi zawrhchhuah bawk turin niin heta ṭanga an sum hmuh zawng zawng chu DUMUSSTKÄMPFEN tan pek a ni bawk ang.

DUMUSSTKÄMPFEN wristband chu siam a ni bawk a, September 6 aṭang khan Darmstadt khawpuia tram (rel chi khat) pakhatah chu club rawnga chei niin 'Johnny, kan lawm e aw' tih ziah a ni bawk.

March-a Johnny a thih khan Darm-stadt player te chuan an fan ruhkawl thih hnua an match hmasa berah Augsburg an hmachhawn a, player te hian an banah, "A tawp thlengin bei rawh, a la tawp lo," tih inziahna chu an hreng a, ni e, engmah a la tawp lo!