Bayern an chak chiang

Carlo Ancelotti-a'n Champions League-a club pasarih enkawl thei hmasa ber nihna dinhmun a luah zanah Bayern Munich hnehna a chanpui a, a vawi ruk nana Europe-a club ṭha ber nih tum Bayern hian a vawi khat nana Champions League khel FC Rostov chu 5-0 in an sawp.

Bayern Munich tan Robert Lewandowski-a'n penalty aṭanga goal hmahruai a khung hnuah Thomas Muller chuan a kum 27 tlin lawm nan an goal hnihna a khung a, Joshua Kimmich chuan goal hniha belhchhahin Juan Bernat chuan goal khat a khung ve bawk.

Goal hnih khungtu kum 21-a upa Kimmich hian ni 10 chhungin Germany leh Bayern tana a goal hmasa ber a khung a, Champions League-a a goal hmasa ber a khung leh tak bawk avangin a tan chuan tun ni 10 chhung kha hun duhawm bik a ni.

Champions League-a Parma, Juventus, AC Milan, Chelsea, PSG, Real Madrid leh Bayern enkawl tawhtu Ancelotti chuan, "Champions Lea-gue nomawi chawi turin kan ṭha tawk a, a pawimawh hmasa ber erawh group hmahruaitu nih phawt a ni," tiin hma-bak an la ngah thu a sawi.

Nikum finalist Atle-tico Madrid pawhin an mikhualna ramah hnehna an chang nghal a, Saul Ni-guez-a scissor kick ropui hmangin PSV Ein-dho-ven chu 1-0 in an hneh.

PSV khelmuala in-khelah mualneitu team an vanduai a, minute 5-na leka Luuk de Jong-a goal khung chu ball siamsaktu Hector Moreno-a'n ball a cross hmain Filipe Luis lakah a foul nia a lan avangin referee Martin Atkinson chuan a pawm sak lo a, Andres Guardado penalty pet chu Atletico tan goalkeeper Jan Oblak chuan ṭha takin a dan sak bawk.