I Day Football Chanmari leh Police-in point an insem
2015 Independence Day celebration football tournament match hmasa berah Mizoram Police FC leh Chanmari FC te 1-1 in an inhnehtawk a, MPL2 champion Chanmari FC an vannei zawk.
Nimin chhuna Lammuala inkhelah Chanmari FC-in striker Malsawmfela hmangin minute 28-naah hma an hruai a, second half-ah Mizoram Police FC-in midfielder Lalramtharmawia hmangin minute 52-naah an sut a, goal dang a luh belh lo.
Chanmari FC-in coach thar HC Zarzoliana kaihhruaina hnuaiah khelh dan phung thar an nei a, 4-4-2 formation aṭangin 4-3-3 formation an hmang a, an la bel tawk lo. Chanmari FC-in game mawi an khel lo a, an nawr chhun erawh en liam mai theih a ni lo.
Chanmari FC-in Joseph hmanga an hmahruaina goal chu offside vangin pawm a ni lo a, hemi hma hian Sawmfela'n Police keeper Hriata chiah a hmachhawn a, goal zawnah a pet lo. Ramhlun South tlangval hian minute 28-naah goal a khung tho a, ama thawhrah liau liau a ni.
Mizoram Police-in bul an ṭan chhe lo a, midfield laia awm Ṭ-a leh Mamawitea te an thawkrim a, Chanmari midfielder-te'n an chelh lo. First half-ah Police-in sutna hun ṭha an nei a, midfield laia awm Mamawitea'n hnai takah a hlah a, Ṭ-a ball pet ṭha tak Chanmari defender-in an dang hman a, striker thar Ruatpuia'n chance ṭha a hlah bawk. Police-in chance ṭha ngah mah se Chanmari FC-in first half-a hmahruaitu nih an phu zawk.
Second half-ah Chanmari FC-in midfielder thar Reuben Zosangpuia an dah lut a, inkhel an thunun phah lo. Ṭan tirh phatah game concentration an hloh an tuar. Police-in freekick hmang ṭangkaiin minute 52-naah Mamawitea hmangin an siphurh an sut a, Chanmari tlar hnung marking a ṭha lo.
Police player pawimawh Fakzuala inhliam vangin lakchhuah a ni a, chutichung chuan Police hian goal khungna chance an ngah zawk. Hun tawp hma hretin Police winger Sangbera'n hnai tak aṭangin goal khung theihna a nei a, goal ban a pet per. Second half-ah coach Zara awm pui loh Chanmari an insiam rem thei lo a, vannei takin point khat an hlawhchhuak.
Mizoram Police coach Lalduhawma chuan, "Kan khelh danah ka lungawi lo a, semifinal lut turin beiseina sang tak kan nei," tiin a sawi a, inhliam vanga second half-a lakchhuah Fakzuala dinhmun a hriat chian hman loh thu a sawi bawk.
Inkhel Results
Chanmari FC 1-1 Mizoram Police
CFC : Malsawmfela 28'
Police : Lalramtharmawia 52'