United hneh loh PSG an champion

Paris St Germain-in Blaise Matuidi leh Zlatan Ibrahimovic te goal hmangin Ningani zing khan Manchester United 2-0 in an hneh a, 2015 International Champions Cup-ah an champion.

Soldier Field, Illinois-ah United goalkeeper David de Gea-a'n bul a ṭan a, a chet ṭhat ber ṭum a ni lo. Spanish keeper hian professional takin training a nei tih manager Louis van Gaal-a'n sawi mah se report ṭhenkhatah a teammate-te'n De Gea ngaihtuahna chu Real Madrid lamah a awm tih an tarlan avangin United keeper hmalam a la chiang thei lo.

United-in Santiago Bernabeu lama De Gea kaltir tur chuan Real defen­der Sergio Ramos lei ve thung an duh a, hei hi Real-in rem an ti thei lo. Van Gaal hian a keeper-in chhuah a duh thu hi a pha tawh lo a, tuna an dinhmun chu tu tan pawha a ṭhat loh vek thu a sawi.

Club America, San Jose Earthquakes leh Barcelona hnehtu Manchester United-in PSG an hmachhawn ṭum hian player 11 hlawk an thlak tawh lo a, Louis van Gaal-a'n chak loh a hreh tih a lantir. Amaherawhchu Angel di Maria tel lohna United-in inkhel thlak danglam turin Wayne Rooney leh Memphis Depay aia lut tur player ṭha a nei lo a, goal an khung lo.

Dutch manager Van Gaal-a'n season thara cheṭha turin striker leh tlar­hnung tiphui thei tur defen­der ṭha a mamawh tih a chiang.

PSG tan Tottenham aṭanga an lak midfielder Benjamin Stambouli chuan starting eleven a chang a, manager Laurent Blanc hman theih turah Copa America khel winger ṭha Javier Pastore leh Ezequiel Lavezzi te chu awm mah se chhawr an ni lo. French champion hian United aṭangin Angel di Maria lakluh an la tum cheu bawk.

Inkhelh zawhah Di Maria chungchang hi sawichhuakin Van Gaal chuan Argentine winger awmna chu a hriat loh thu a sawi. Hetihlai hian PSG coach Laurent Blanc chuan, "Manchester United leh PSG hi club lian tak kan nih avangin inbiakna kalpui a harsa a ni. Mahse a tawp kan thleng ṭep tawh e," tiin Di Maria an lakluh hnaih thu a sawi thung.

2015 International Cham­pions Cup hi Aus­tralian edition, Chinese edition leh US edition-ah ṭhendarh a ni a, PSG cham­pion-na hi US edition a ni.

US edition-ah hian champion PSG bakah New York Red Bulls, Man­chester United, LA Galaxy, Barcelona, Club America, Chelsea, Benfica, Fio­rentina leh San Jose Earth­quakes te an tel.

Australia edition-ah Real Madrid an champion a, Roma leh Manchester City-in an tluk lo.

Chinese edition-ah Real Madrid, AC Milan leh Inter Milan te an inel a, nizan khan Inter hneh ve ve tu Real leh Milan ten match hnuhnung ber an khel a, result kan hre hman lo.