Arsenal keeper Roma-ah

Arsenal goalkeeper Wojciech Szczesny chuan season khat chhung atan Italian club Roma chu loan-in a zawm.

Kum 25-a upa goalkeeper hian kum 2006 khan Legia Warsaw aṭangin Gunners hi a zawm a, match 180 lai a khel tawh. Mahse, season hmasa khan David Ospina lakah a dinhmun hlohin khelhna hmun a chang ta meuh lo.

Season hmasa khan Premier League match 17 chauh khelin Gunners tana a inlan hnuhnun ber chu May thla kha niin hemi ṭum hian FA Cup final-ah Aston Villa an hneh.

Tun nipui transfer chhungin Arsenal hian Chelsea aṭangin Petr Cech an lakluh tawh bawk avangin Poland international Szczesny tan season tharah inkhelh tam a beisei awm hran lo. Hetiang a nih avang hian a inkhelh tam theihna tur hmun nia a rin a pan ta a ni.

Arsene Wenger chuan, "Szczesny hian theihna sang tak a neih avangin kum 20 mi chauh a nih laiin first team-a khel turin ka ko tawh a ni. Kan hnenah hian atan hmun ala awm reng dawn a; a chhuahna tur Roma pawh hi club lian an nih ve tho avangin tawnhriat tam tak a neih belh ngei ang," tiin an keeper tan Emirates Stadium-ah hmun ala awm thu a sawi.