D Licence Course tluang takin an zo

AIFF D Licence Certificate Course chu February 17-22, 2025 chhung khan 1st Battalion MAP Ground, Armed Veng-ah neih a ni a, Inrinni khan a kharna hun neih niin MFA honorary secretary Lalrengpuia leh S. Malsawmtluanga (Mama) ten hun an hmanpui.

D Licence Course hi instructor Vikash Panthi kaihhruaina hnuaiah neih a ni a, Mizo coach pahnih K. Lalrindika leh R. Lalruatfela ten assistant instructor hna an thawk. Course-ah hian mi 25 an inziaklut a, damlohna avangin mi pahnihin an zir tluan thei lo.

Vikash chuan, "Hmasawnna ṭhahnem tak ka hmu a, ka lawm hle. Kan ṭantirh chuan classroom-ah pawh zawhna kan zawt ṭha ngam lo a, a tawp meuh chuan zawhna pawh kan zawt nasa. Practical exam-ah pawh hmasawnna hmuh tur a awm a, a hnuhnung zawkah chuan kan ṭawng ri a, kan thil tumah kan chiang tawh bawk," tiin a kharna hunah a sawi.

Meghalaya aṭanga rawn kal instructor Vikash chuan sawi chhunzawmin, "Practical atana naupang rawn kalten inkhelh thiam a, hmun dangah chuan hetiang hi ka hmu ngai lo. Naupang ṭha tak an rawn kal chhan hi in hnathawh a ni a, an inzirte an ni a, ka fak duh che u a ni," tiin a sawi a, Reliance leh MFA chungah lawmthu a sawi bawk.

Course chhimtu coach-te hi Aizawl, Kolasib, Champhai leh Lunglei aṭanga kal khawm an ni a, Reliance Foundation Young Champs (RFYC) Naupang League-a coach-te an ni. An zirna man zawng zawng hi RYFC chuan a tum sak vek.

Course hi ni ruk chhung neih a ni a, dar 8:00 aṭanga ṭanin dar 6:00 thleng neih ṭhin a ni. Coach pakhat zelin practical pahnih bakah theory exam an hmachhawn. Result hi dan naranin thla thum chhung ngeiin AIFF-in an peihfel ṭhin.