FIFA presidential election Michel Platini-a'n English FA thlawpna a hmu

England Football Association chuan February, 2016-a FIFA president thar thlan huna chuh tum UEFA president ni lai Michel Platini chu an thlawp tur thu an sawi.

FA chairman Greg Dyke chuan, "Hruaitu ṭha, danglamna thlen thei kan mamawh a, Platini hian FIFA chhiatna laite a thawm ṭha theiin kan ring tlat a ni," a ti.

Nakkum February 26-a FIFA president thlan hunah hian Platini bakah South Korean sumdawng hausa leh FIFA vice-president hlui Chung Mong-joon, FIFA secretary general hlui Jerome Champagne, May thlaa Blatter hneh tawh lotu Prince Ali Bin al-Hussein te chu FIFA president chuh tura hming lam zinga langsar pawl an ni.

Dyke chuan hemi chungchang hi sawi langin, "FIFA president chuh tur hi chu tam tak an awm ang tih hi ka ring sa a, hei hian inelna thianghlim leh hruaitu ṭha ber thlanchhuah kawngah min pui dawn a ni. Kan theihnghilh miah lo tur erawh pawl tluchhe mek leh talbuai mek hruai tur chuan kan chak tawk a ngai dawn a ni," tiin FIFA president nih tumte chu a chah lawk.

England FA hian Platini an thlawp tur thu sawi mah se tun hmain UEFA president leh English FA hian intihthiamlohna an lo nei tawh. French pachal Platini hi kum 2022 World Cup Qatar-in an thlen theihna tura thlawptu zinga mi a ni a, English FA erawh Qatar thlawp lotu an ni.

Tun hmaa an lo buai tawhnain Dyke a tibuai lo, England FA president chuan, "Platini hian Qatar a thlawp thu hi ualau takin a ti lang a, 2022 World Cup thleng tura a vote thu pawh a pha lo. Qatar vote tu midang zawng zawng kha Platini anga lang tlang ni se chuan tun ai hian FIFA a buai lo zawk ang," tiin thil inthup awm ṭhin chuan FIFA a tihbuai thu a sawi.

Hetihlai hian May thla FIFA presidential election-a Platini-a'n a thlawp Prince Ali erawh Platini chung­ah a lawm lo. Jordan lal chhungkaw zinga mi Prince Ali chuan, "FIFA hian hruaitu thar, mi thar leh FIFA sulhnu a la inhnamhnawih ve lo a mamawh a ni. Football player leh fan-te hian Platini aia ṭha zawk hi an phu a ni," tiin FIFA siamṭha tur chuan mi thar an mamawh thu a sawi.

Liberian Football Association president Musa Bility pawhin Platini-a'n FIFA president a chuh tur chu ṭha lo a tih thu sawiin football khawvelah inlungrualna aiin thawhho ṭhat lohna a thlen theih zawk thu a sawi a ni.

Tu nge Platini?

France captain hlui leh an player ropui sawi apianga sawi hmaih tawh loh tur Platini hian a vanglaiin Ballon d'Or ṭum thum ngawt a dawng. FIFA-in player ropui 100 a thlanchhuah zingah a tel a, Juventus tan a khelh laiin European Cup, Cup Winners' Cup leh Super Cup te a chawi vek a, Serie A-ah season hnih a champion pui bawk.

Ram tan vawi 72 inlana goal 41 khungtu hian 1984 Euro-ah France a champion pui a, inkhelh a chawlhsan hnuin France hi a enkawl chhunzawm. Coach a nih lai paw'n Platini a hlawhtling; kum 1991 khan World coach of the Year leh European coach of the Year-ah thlan a ni. Coaching lamah Platini a inhman chhunzawm lo.

Kum 1998 World Cup France-in a thlen dawn khan organising Committee-ah chairman a ni a, kum 2002 khan FIFA executive committee member a ni ṭan. Kum 2007-ah UEFA president-ah thlan tlin niin tun thlengin he hna hi a chelh chhunzawm.

Platini ṭawngkam

Kum 60-a upa Platini chuan, "Mihring nunah hian thutlukna harsa tak siam a ngaih chang a awm ṭhin a, chu thutlukna khirhkhan tak chu FIFA siamṭhat theih beiseina avangin ka siam a ni. FIFA hian siamṭhat a mamawh takzet tih chu kan hmu vek a, siamṭhat hna thawk tur hian theihtawp chhuah ka tum a ni," a ti.

Platini chuan sawi chhunzawmin, "Europe-a football ram hrang hrangte inlungrual theihna turin theihtawp ka chhuah ṭhin a, ram lian leh tenau zawng zawngte hnenah thliar hranna awm hauh loin an phu tawk ang zelin hamṭhatna ka pe a ni. UEFA-a ka hnathawh ṭha tak hi khawvel huap atan FIFA-ah hian chhunzawm ka duh a ni," a ti.