Champions League Celtic-in Champions League an hnaih

Celtic chuan season thara Champions League khel tur­in kawng dik an zawh zel; Ningani zan khan third qua­li­fying round first leg-ah Qara­bag chu Dedryck Boyata goal khat tauh luh hmangin an hneh. Karleh Nilaini khain second leg khelh leh tur a ni ang.

Celtic Park, Glasgow hmuna inkhelah hian Celtic tan hian Gary Mackay-Steven chuan firsthalf-ah vawi sarih ngawt goal thun tumin pet mah se vawi khat chiah goal zawnah a kal.

Azerbaijani champion Qarabag tan Qarabag goal­keeper Ibrahim Sehic a khel ṭha hle a, striker Nadir Ciftci leh Virgil van Dijk te goal khung ngei tur dan sak mah se minute 82-a Boyata tauh luh erawh a dang zo lo.

Kum 2018 thleng cham tur a contract ziak thar hlim Celtic Goalkeeper Craig Gordon-a'n hna a nei lo hle a; Qarabag hian minute 90 chhungin goal shot vawi li nei ve mah se vawi khat mah goal zawnah an pet lo.

Celtic manager Ronny Deila chuan, "Kan khelmuala inkhel kan ni bawk a inkhel kan thunun hneh a, goal pawh kan khung ngei. Mahse inkhel ala tawp lo tih kan hriat a ṭha. Europe-ah chuan team tin mai hian mahni khelmualah chuan chak kan tum vek avangin karlehah hian tun aia ṭhaa kan khelh a ngai ang," tiin a sawi.

Scottish club Celtic hian third qualifying hi an paltlang thei a nih chuan playoff an khel thei ang. Playoff khel tur hian Premier League club Manchester United, Valencia, Bayer Leverkusen, Sporting CP, Lazio te an tling sa bawk. Playoff pal­tlangte hian season tharah Champions League group stage an khel thei dawn a ni.