Maradona-'n FIFA president nih a tum em ni?

Argentina football legend Diego Maradona chuan FIFA chhung­kuaa buaina thlentute chu hmachhawn a duh thu a sawi. Tun hnaiah FIFA hi eiruk thu­buai vangin a mualpho mek a, hetianga mualphona thlentute hi Maradona chuan FIFA aṭang­a paih­chhuah vek a duh thu a sawi a ni.

Khawvela footballer ropui ber ang hiala mi tam takin an ngaih Maradona chuan, "Eiruk ching FIFA chhungkuaa la awm mekte hi hmachhawna thenfai ka duh a ni. Nasa taka FIFA rawktute hi zirtirna ka pek an ngai a ni," tiin a ṭawng pawr hle.

Nakkumah FIFA president thar thlan­na neih a ni tawh dawn a, Argen­tine midfielder ṭawngchhuah chhan hi FIFA president chuh ve a tum vang nia ngai an awm.

Hemi chungchang hi sawiin Maradona chuan, "FIFA a tel ve theih hi ka duh takzet a ni," a ti.

May thla tawp lam khan FIFA hruaitu 14 lai chu US Department of Justice-in eiruk thubuai a lo siamsak tawh a, mi pasarih chu man an ni tawh nghe nghe.

Kum 54-a upa Maradona hian hun rei tak aṭang tawh khan FIFA president ni mek Sepp Blatter hi a lo sawisel tawh ṭhin a, Swiss pachal chuan FIFA chu thilsual ti ṭhin pawl dukdak lo ang maiin a kaihruai niin a lo sawi hial tawh.

Maradona chuan US thuneitute chet dan chuan a tih lawm takzet thu a sawi a, player a nih lai leh a chawlh hnu pawha chanchin ngah ve tak Maradona chuan, "Tunah chuan American ho nen hian kan inlungrual ta hle a, kan ngaihdan pawh a in ang hle a ni. Heng American te hian an hmalaknaah hian an ti mai mai lo," tiin FIFA hruaitu eiruk thubuai an siamsakte chu a vau zui.