Barca-in hma lam an pan zel
Tun hnaia Real Madrid leh Atletico Madrid chetsual vanga La Liga table chung ber luahtu Barcelona-in chetsual an tum tawh lo - Inrinni zan khan an mikhualna ramah Las Palmas chu 2-0 in an hneh a, table chung ber an luah chhunzawm.
Barcelona tan Dani Olmo leh Ferran Torres ten goal khat ve ve an khung a, mualneitu Las Palmas-in a chhanletna tur an neih loh avangin Barca-in point thum an hawn.
Catalan club-in hma hruai mah se pahnihna Atletico Madrid aia an sanna hi point khat chauh a ni. Atletico hian Inrinni zanah vek 3-0 in Valencia an sawp a, Julian Alvarez chuan goal hnih khungin, Angel Correa chuan goal khat a thawh bawk.
Nizan khan Real Madrid an inlan a, an result kan hre hman lo. Carlo Ancelotti naute hian hnehna an chan chuan Barca nen an point hmuh zat a inang ang a, head-to-head a an chhiat zawk avangin pahnihna an ni ang.
Kha le, Barca
Las Palmas khelmualah Barca-in goal an khung lawk lo a, first half chhunga an khung theih loh avangin fans an hlauthawng hman - mahse, second half-ah substitute hmanga chhanhimin an awm.
Minute 62-naah bench aṭanga lut Dani Olmo-a'n danglamna a thlen a, Spanish attacking midfielder hian Lamine Yamal-a siamsak chu goal-ah a chantir - November hnua a goal khung leh hmasak ber a ni.
Olmo hian tun season-ah hliam leh player registration neuh neuh avangin buaina a tawk reng a, heti chung hian match 22-ah goal sarih a khung ta a, assist vawi thum a nei bawk.
Barca hian goal khatah an duhtawk mai dawnin a lang hman a, mahse, hun pek belh minute nganaah Ferran Torres inlar ve lehin, an goal hnihna a khung a, 2-0 in Barca an chak.
A chhehvel chu
Barcelona-in minute 80-naah penalty an chawi dawn emaw an ti - Eric Garcia chuan Álex Suárez-a shot chu penalty box-ah a kutin a dang a, referee Carlos Del Cerro Grande chuan video assistant referee a rawn hnuah penalty a pe.
Mahse, VAR lam hian handball hma hian offside a awm theih thu referee hi an hrilh leh a, referee hian offside vangin handball a ham leh ta lo!
La Liga-ah semi-automated offside technology hman a ni reng chunga, VAR lamin referee handball en chhung an nghak phawt kha thil mak tak chu a ni ve hrim hrim.
Hetihlai hian Lamine Yamal pawhin inkhelh zawh lamah a ke thi lai thlalak chu instagram lamah pholangin, foul pek a ni lo chu mak a tih thu a sawi - Olmo goal khung tur a siamsak kha tun season-a assist vawi 15 a neihna chiah a ni.
A hming Alvarez
Manchester City-in ui loa an kaltir, amah thlaktu tur pawh an lak loh Julian Alvarez-a'n City thuneitute inchhirna tur a thlen nawntir a, Inrinni zan khan goal hnih a khung.
Alvarez hian first half-ah goal hnih khungin, minute 86-naah Correa chuan a belhchhah a, Diego Simeone hote 3-0 in an chak. Argentine striker Alvarez hian Atletico a pan hnuah match 38 khelin goal 19 a khung ta a, assist vawi li a nei bawk.
Atletico hi January thla tawpa Leganes laka an tlawm hnuah, ngai an awh hleithei lo a, a hnua league match li an khelhah vawi khat chiah an chak - Inrinni zanah an chak ve leh ta a, champion an la tum tih an pholang.
Valencia erawh an tlawm avangin relegation zone-ah an awm a, Spanish club lar hi season thara La Liga khel lo thei dinhmunah an ding mek.