Filipe Luis-a'n Atletico fan-te rilru hneh thei a inbeisei

Atletico Madrid defender thar Filipe Luis chuan a club hlui lama a kir leh hnuah fan-te rilru hneh theih a inbeisei thu a sawi.

Kum 29-a upa defender hian nikum nipui transfer-ah khan Atletico aṭang hian Chelsea a pan a, Stamford Bridge-ah beisei anga hmun a chan tam loh avangin kum khat chauh a khel hman tihin a club hlui lamah hian a kir leh a ni.

Brazil international hian La Liga nomawi an chawi zawh hlim chiaha Chelsea lam a pansan hi Atletico fan tam tak chuan an ngaithiam thei lo a, sum vanga anmahni phatsanah Luis hi an puh a ni.

A vawi hnih nana Atletico player ni tur chuan, "Kum khat hnua he hmuna ka lo kir leh thei hi ka lawm hle. Chelsea-ah khan hun hlimawm tak hmangin Premier League-ah ka champion hial a ni. Atletico Madrid hi ka in a ni a, ka hun tawna hlimawm tak takte kha he hmunah hian ka tawng a ni," tiin Atletico fan-te rilru hneh let a tum hle.

Filipe Luis chuan sawi chhunzawmin, "Ka team­mate-te hi an fel em em a, Chelsea ka awm lai pawh khan kan inbe reng a ni. Atle­tico inkhel hi ka la en fo ṭhin a, ka ṭhiante pawn Chelsea tana ka khel an en fo ṭhin. Fan-te hnena ka chah duh chu Atletico kawr ha chunga ka inkhelh apiangin ka theihna zawng zawng ka pe ṭhin a, ṭawngkam ni lo ka thil­tih hmangin fan-te min ṭawi­awmna hi chu ka neihlet leh theih ka inbeisei a ni," a ti.