Chelsea an tlawm leh ta

Enzo Maresca-a'n, "Champion sawi ri thei kan la ni lo," a tih lai khan Blues fan-ten an coach hi 'dawih' lutukah an ngai a, mahse, Italian coach-in thil nihna tak a sawi tih an hrethiam chho ṭan.

Chelsea hian tunah chuan, "Champions League khelh ngei kan tum dawn," tia inhnem an mamawh ta - Inrinni zan khan an mikhualna ramah Aston Villa chu 2-1 in an ngam lo a, Liverpool chelhtu Villa-in Blues an hneh leh tak avangin UCL beiseina a sang sawt dawn.

Villa Park-a inkhel hi 'loan' lansarh zan a ni! Mualneitu team tan Paris Saint-Germain aṭanga loan-a an hawh Marco Asensio chuan goal hnih a khung a, Manchester United aṭanga loan-a lakluh Marcus Rashford-a siamsak ve ve a ni.

Chelsea hian minute kuana lekah Enzo Fernandez hmangin goal hmahruai an khung a, Pedro Neto chuan chak zeta ball tlan luhpuiin, Enzo tan a siamsak - khung harsa a ni tawh lo.

London club phur hman viau mah se, second half-ah bench aṭanga luhtir Rashford hmangin Villa-in inkhel an thlak danglam. Minute 57-naah Matty Cash-a ball thlawh luh chu Blues right back Malo Gusto chuan lo khawih perin, Rashford hian ṭha zetin a lo siamsak a, Asensio tan khung a harsa tawh lo.

Rashford hi a tirah offside-a ngaih ni mah se, video assistant referee a inrawlh hnuah pawmsak a ni a, minute 90-naah Chelsea goalkeeper Filip Jorgensen chesual zuiin, Rashford-a siamsak, Asensio 'shot' chu a man nghet zo lo a, Villa an chak.