Milan tlawm zanah Inter an chak

Serie A champion lai Inter Milan chuan Inrinni zan khan Lautaro Martinez-a goal khat hmangin Genoa chu 1-0 in an hneh a, inkhel dangah AC Milan erawh Torino mualah 1-0 in an tlawm thung.

San Siro-a inkhelah goal kan hmu mai lo, hun ṭha tak tak insiam ṭhin mah se an hlawhtling thei chiah lo - substitute Hakan Calhanoglu khung loh phei chu an sawi zui rei viauin a rinawm.

Minute 78-naah danglamna kan hmu, corner aṭanga ball kal chu Martinez-a'n a tauh fuh a, lo dansak tum mah se an dang per zo lo, mikhual laka point thum hmuh nawn a tawk a ni.

Inter Milan manager Simone Inzaghi chuan, "Genoa khan fak an phu, minute 90 chhung ṭha taka khel thei an nih avangin hmachhawn kha an harsa takzet, hei chu sawi danglam theih a ni lo ang.

"Tun season atan inelna hrang hrangah match 37 kan khel tling ta chiah bawk a, ram tana feh chhuakte chuan hei aia tam hi match an khel bawk, ka naute ṭhenkhat kha chu an chau tawngkhawng ve tawh hle.

"Duhthusam ang thlawpin khel chhuak vek lo mah ila hnehna kan chang a, kan goal kan venghim thei a nih hi chuan kawng thui takin a inhawng nghal mai ṭhin," tiin a sawi.

Inter Milan hian Serie A match 26 aṭanga point 57 hmuin hma an hruai lailawk a, pahnihna ni lai Napoli-in an match hmabakah hnehna an chang a nih erawh chuan hmahruaitu hi an inthlak leh nghal ang.

Genoa coach Patrick Vieira chuan, "Team ṭha leh khawng tak laka ka naute chen danah khan ka lawm. Player tin khan an hna chanpual an thawk ṭha vek, goal kan chhuah dan pawh kha vanduai vang chauh a ni," a ti.

Inkhel dangah AC Milan an chefuh lo. Minute ngana lekah defender Malick Thiaw chuan anmahni lamah a ti lut a, second half-ah Tijjani Reijnders chuan sut mah se, minute hnih hnu lekah Gvidas Gineitis chuan Torino chakna goal a khung.

Sergio Conceicao-a enkawl AC Milan hian point 41 chauh an la hmuh avangin nomawi sawi ngam tur an ni tawh rih lo, pasarihna an nih mek avangin season thara Champions League ticket neih pawh a harsa tawh dawn a ni.