Alan Shearer-a'n Chelsea a la ring ber

England striker ropui chawl ta Alan Shearer chuan season thar Premier League-ah champion lai Chelsea tho an champion leh a rin thu a sawi.

Newcastle United legend chuan, "Chelsea hian season hmasaah khan awlsam takin Premier League title an chawi; February-ah kha chuan an champion fel tawh a ni deuh ber. Tun season-ah pawh an ni bawk hi an champion ka ring a, season hmasa ai erawh chuan a hautak zawk ang," a ti.

England tan vawi 63 a inlana goal 30 khungtu striker chuan champion tur chuan Manchester United chuan hmabak tam tak an la neia a hriat thu leh Liverpool manager Brendan Rodgers chu pressure na tak hnuaiah a awm thu a sawi.

Premier League-a goal 260 khunga goal khung hnem ber ni mek Shearer chuan English winger Raheem Sterling chungchang sawi langin Manchester City player thar chuan a man zat pound maktaduai 49 chu phu loa a hriat thu a sawi.

Kum 1994-95 season Premier League-a Blackburn Rovers champion puitu chuan, "Sterling hian pound maktaduai 49 hi a phu nia i sawi chuan dawt i sawi tihna a ni ang. Player ṭha tak, hmabak eng tak nei leh che rang tak a ni tih hi chu phat rual a ni lo. Mahse, ka ngaihdan chuan hmasawnna tur tam tak a la nei a, pound maktaduai 49-a lei hi a phu lo," a ti.

Arsenal-in pound maktaduai 10-a an lei thar Petr Cech chungchang sawi langin Shearer chuan, "Cech hi Arsenal-ah hian a che ṭha dawn tih ka chiang a, London club hian an keeper thar hi an ṭhatpui ang. Mahse, Premier League-ah hian champion an duh tak tak a nih chuan centre forward ṭha tak an la mamawh a ni," tiin Arsenal chu champion tura an la ṭhat tawk loh thu a sawi.

Shearer chuan Manchester United pawh champion tur chuan an squad-a la chhah tawk loa a hriat thu a sawi a, Magpies tan vawi 405 a inlana goal 206 khungtu striker chuan, "United hian hnathawh tur tam tak an la nei a ni. City leh United hian danglamna vak an nei lo a, Chelsea elpha thei ber tur an ni. Mahse, ka ngaihdan chuan anni club pahnih hian player pakhat emaw pahnih tal chu an lak belh a la ngai a ni," a ti.

Tun nipui transfer-ah English club lian zingah Liverpool an che na hle. Reds hian player liantham zingah City aṭangin free transfer-in James Milner an la lut a, Hoffenheim aṭangin pound maktaduai 29 man Brazil playmaker Roberto Firmino bakah Aston Villa aṭangin pound maktaduai 32.5 man Belgian striker Christian Benteke an la lut bawk.

Blackburn Rovers tan vawi 171 a inlana goal 130 khungtu Shearer chuan Liverpool chungchang hi sawilangin, "Brendan hian season hmasa ang thoin pawisa tam tak a hmang leh tawh a, tun kumah chuan hlawhtlinna engemaw tal chu a chan a ngai tawh a ni," tiin sum hmang hnem Rodgers chungchang a sawi.

Liverpool hian season hmasaa beisei an phak loh avangin assistant manager Colin Pascoe leh first-team coach Mike Marsh te chu an ban. Shearer chuan, "Backroom staff-te hi kan chet chhiat chhanah puh tur an ni em ka hre chiah lo. Mahse, Liverpool-in hmasawn an tum dan en hian nomawi engemaw tak chu an chawi ka beisei a, Rodgers hian boruak sang tak hnuaiah a naute a enkawl thiam a ngai dawn a ni," a ti.

Shearer chuan a career tam zawk a hmanna leh tun nipui transfer-a chet nat tum tak Newcastle United chu top four-a lang tur em chuan an la tenau deuha a hriat thu a sawi a, nomawi chawi an duh chuan FA Cup leh League Cup lama an rilru pe turin a fuih a ni.