I Day Football ni hnihna Chanmari W Vs Luangmual; Zo United Vs Aizawl FC

I League club Aizawl FC-in vawiin hian season thara an match ber an khel dawn, tlai dar 3:00-ah Zo United FC an hmachhawn ang.

Luangmual FC leh Chanmari West FC ten chhun dar 12:30-ah I Day Football thawhhnihnaah bul an ṭan dawn a, Lammuala inkhel en man hi Rs 30 a ni.

Luangmual Vs Chanmari West

Chanmari West FC tan match hmasa bera MPL kaithar Luangmual FC hmachhawn hi a fuh a, Aizawl FC leh Zo United FC awmna group a nih vangin chak lo zawk an awm a nih chuan semifinal kalkawng a zim tawh khawp ang.

Luangmual FC-in tawnhriat nei player an ngah lo a, coach Vanlalrova bakah tawnhriat nei ṭha Didina leh Tat-a te AIFF D Licence course chhim vangin an tel thei dawn lo a, chu chuan MPL2 finalist harsatna a belhchhah ang.

Chanmari West FC keeper Mama, Hmangaihzuala leh Ramliana te'n training an la zawm lo a, captain Zion-a'n coaching course a chhim bawk. Player ṭha awm loh hi chhuanlam siam nan a thiang lo, point thum pawimawh dan a la ngai reng.

Team pahnih hian an ṭhat theih dan ber lantir lo nachungin inkhel hmuhnawm phochhuak thei tur player an la kawl tho. Chanmari West FC midfield trio TS Zadeng, Sawmtea leh Reitlang player hlui Zawma te fiahin an awm dawn a, Luangmual FC striker thar Durtlang tlangval Notea hi hming chher zel tura beseiawm a ni.

Luangmual FC manager Lalṭhazuala chuan, "Tawnrhiat nei kan chan tur hi a pawi mawhin, theihtawp kan chhuah ang. Tun hi MPL atana inpuahchahna ṭha a ni a, tih mai mai kan tum lo," tiin a sawi.

Chanmari West FC coach Chawngthangsanga chuan, "Player tharten duh angin game plan an la bel lo. Chutihrualin Luangmual FC hmaa kan team nihna dik tak hriat hi a châkawm tawh khawp mai," tiin player tharte khelh dan hmuh a châk tawh thu a sawi.

Zo United fiahna

MPL season thum awm tawha best keeper ni vek thei Lalawmpuia la lut thei Zo United hi dah hniam theih an ni lo a, he team-ah hian Tuaitea, Ricky, Tluanga leh Malsawma Chhangte te an awm a, Samson-a enkawl a nih bawk avangin Aizawl FC tan chetsual theihna a ni.

Aizawl FC leh Zo United hi practice match an intum fo a, I League second division champion hi an chungnung zawk. Aizawl FC-in Valpuia leh Biaktea te Police aṭangin an la lut a, ZoFooty player of the year David leh tawnhriat nei ṭha Rohminga an kawl bawk avangin hmuhnawm thamin an khel thei ang.

Zo United coach/player Samson chuan, "Aizawl FC chu an ṭha a, kan inhmachhawn tawh aṭangin uluk takin game plan kan siam a, kan hneh thei tih kan hria. Chutihrualin MPL atana inpuahchah kan ni a, kan practice tlai deuh avangin I Day Football atan chuan kan fitness a la ṭha tawk lo," tiin an la inpeih tawk loh thu a sawi.

ZoFooty coach of the year Aizawl FC coach Malsawmkima chuan, "Zo United-ah player ṭha an tam a, fimkhur takin kan khel ang. Tlar hnung lamah inhliam kan nei a, tlar hma lam erawh kan dam ṭha e. Player thar Valpuia leh Mka te kan hmu nghal ang," tiin attacking game an khelh tur thu a sawi.