Inkhel hmuhnawm - BVT 4-3 Dinthar
Bethlehem Vengthlang FC-in sum sengin tualchhung football-a player ṭha an la lut a, I Day Football champion lai Dinthar FC lakah point thum an hlawhchhuak nghal.
Nimin tlai Lammual inkhel a hmunawm a, goal sarih ngawt a lut. BVT-in first half-ah Lalruatfela, MS Dawngliana leh Lalrammawia te hmanga goal an khung chu Dinthar FC-in captain Lalmuansanga goal hnih leh Samuel Laltlanthanga goal hmangin an sut mah se Laldinliana tauh luh hmangin BVT-in 4-3 in hnehna an chang.
Ṭan phat aṭangin inkhel nung tak team pahnihin an lantir a, box pawn aṭanga Dinthar midfielder Paul Ramfangzauva'n ball kang lai a volley nghal chu class viau mah se crossbar-in BVT a chhanhim.
BVT-in ball an chang tam hret a, minute 12-naah Dinthar keeper MC Lalneihsanga a chesual a, goal ruakah Fela'n a pet goal chiang hle. BVT an inbuatsaihna neih ṭhat field chhungah an lantir a, Dinthar FC pawh an duai bik lo.
First half tawp hmain BVT tan Dawngtea leh Rammawia ten an khung a, goal thumna hi Dinthar keeper MC-a tihsual tho a ni.
Goal thum chhuah hnuah Dinthar an hnual lo a, minute 47-naah MS-a'n penalty aṭangin a khung. Midfielder thawkrim MS-a'n hian minute 55-naah penalty pet nawn lehin BVT keeper Lalremruata'n dang mah se Dinthar captain hian a per chu goal-ah a chantir. Dinthar an phur thar a, substitute Samuel-a ball pet chu goal turin ṭha tawk lo mah se keeper Arema man pial zarah a goal.
BVT keeper Arema'n a tihsual siam ṭhain Samuel-a goal hnihna tur a dan sak a, BVT team pumpui an insiamṭha bawk. Dinthar substitute keeper Laldailova'n ruahsur vanga field nalah harsa a nei ve tho a, minute 72-naa Dingngheta corner Dinliana tauh luhah erawh keeper dem theih a ni lo, BVT defender hian goal khung turin a zuang sang a, a tauh ṭha bawk.
Inkhela chungnung zawk BVT-in goal dang an khung belh thei lo a, Dinthar substitute Vanlalhuma'n volley-in goal chung chiahah a kal bawk. Dinthar chak zo lo mah se an player tharte khelh danah an supporter 'The Maimawms' phurna a pe a, BVT-in champion turin an ṭha tawk tin an lantir bawk.
Dinthar head coach T. Vanlalhluna chuan, "Season bul ṭan nan chuan kan khelh dan kha a ṭha tawk viauin ka hria. Kan khelh danah kan lawm a, inzirna tur kan la ngah erawh tih zep tur awm lo," tiin a sawi.