Foxes chak zanah Spurs an tlawm

Premier League champion Leicester City-in Champions League an vawi khat khelhnaah inthlahrun an tum lo - Nilaini zan khan an match hmasa ber chu khualmualah khelin Club Brugge chu 3-0 in an sawp.

Wembley Stadium-ah Tottenham Hotspurs-in fans 80,000 chuang nen AS Monaco lo mikhual mah se kum nga hnua an Champions League match hmasa berah hnehna an chang zo lo a, mikhual team lakah 2-1 in an tlawm - Spurs inkhel hi English club-in an khelmuala ṭawiawmtu an neih ṭhat ber ṭum a ni.

Thawnthu ngaihnawm

Kum riat kal ta, September thla kha chuan Leicester-in Eng-lish club tenau te inelna Johnstone Paint Trophy khelin first round-a Hartlepool an hneh hnuah champion ngei inbeisei mah se quarterfinal-ah Rotherham an hneh loh avangin an nomawi chawi beiseina a thamral.

Vawiinah erawh Foxes-in Europe-a club te inelna sang ber Champions League an khel a, khualmualah Marc Albrighton (5')-a goal khat leh Riyad Mahrez (29',61')goal hnih hmangin hnehna an chang. Algeria international Mahrez goal khung pahnih hi freekick leh penalty aṭanga lut a ni.

Season hmasaah Foxes-in khawvel barakhaihin league nomawi an chawi a, kumina Champions League nomawi chawi tur chuan 'thawnthu danglam' an ziah nawn a ṭul
ṭur thu a sawi - Champions League-a an match hmasa bera an chak dan ngaihtuahin Foxes fan-ten thawnthu danglam ziah nawn an inbeisei a nih pawhin tu nge dem thei awm ang?

Ranieri thukhawchang

Leicester manager Claudio Ranieri chuan, "Inkhelh hma khan ka player-te hnenah Champions League rimawi tum ri inhriat rualin nangmahniah phurna nasa tak a siam che u ang a, thinlung zawng zawnga beih duhna in nei ang tiin ka hrilh a ni. Liverpool kan hneh loh hnu lawka hnehna chang kan nih avangin a hlu zual bik a, hma taka goal kan khung avangin kan vannei a ni," tiin a chapo duh lo.

Foxes hi Group G-ah Por-tuguese champion Porto leh Danish club FC Copenhagen te nen an awm ho a, Nilaini zan inkhelah dangah Porto leh Copenhagen te hi goal khat ve ve khungin an inhnehtawk.

Spurs an chuai

Tottenham-in White Hart Lane chei ṭhat a nih avangin an khelmual hmang thei loin Wembley Stadium an hmang a, fans 85,011 pungkhawmin Champions League-a khelmual neitu club-in ṭawiawmtu an neih ṭhat ber ṭum a ni hial.

Inkhel ṭantirh lamah Spurs-in Son Heung Min hmangin chance nei nghal mah se South Korean forward ball pet hi Monaco defender Andrea Raggi chuan goal line aṭangin a lo pet chhuak hman a, Spurs vanduai inṭanna a ni.

Minute 15-naah Bernardo Silva chuan angle zim tak
aṭangin Monaco tan hmahruaina goal a khung a, substitute Thomas Lemar-a'n minute 31-naah khung ve lehin Wembley stadium-a mipui 80,000 chuang pungkhawmte thawm a reh hle.

Spurs tan Toby Alder-weireld-a'n minute 45-naah goal khat tauh lut ve leh mah sela Spurs harhtharna a thlen zo lo a, Harry Kane-a'n hun tawp dawna chance ṭha tak a hlohte chu Tottenham fan-te pawi tih tizualtu mai a ni.

Pochettino a lawm lo

Tottenham-in Monaco an mikhual hmaa Wembley-a an match hnuhnung pangaah vawi khat chiah hnehna an chang thei a, White Hart Lane-a an khelh theih loh vanga chak loah mi tam takin an ngai.

Mahse, Spurs manager Pochet-tino chuan, "Chhuanlam tling a ni lo. Football chu khel-mualah, grass chungah khelh a ni ṭhin a, engmah a danglam lo. Hmasawn kan mamawh a, kan goal chhuah ang kha chhuah nawn fo chi pawh a ni lo. Goal khung theihna hun ṭha kan nei a nih chuan kan huaisen tur a ni a, theihtawp kan chhuah tur a ni. Tun aia nasa zawk hian chak duhna thinlung kan neih a ngai a, vawiinah khan ka player-ten an theihna zawng zawng an pe lo a ni," tiin a lungawi lo hle.

Group E inkhel dangah Bayer Leverkusen leh CSKA Moscow chu goal hnih ve ve khungin an inhnehtawk a, German club Leverkusen tan Admir Mehmedi leh Hakan Calhanoglu ten goal hnih an khung zet hnuah mikhual team CSKA tan Alan Dzagoev leh Roman Eremenko te chuan an si phurh an sut ve leh a ni.