Ronaldo hoin Real Madrid an chak
Champion lai Real Madrid chuan Sporting Lisbon lakah fiahna hautak an hmachhawn nghal a, hun tawp dawna Cristiano Ronaldo leh Alvaro Morata te goal khung hmangin 2-1 in hnehna an chang hram. Nilai zan Champions League inkhel dangah Borussia Dortmund chuan Legia Warsaw 6-0 in an sawp bawk.
Santiago Bernabeu-a inkhel-ah beisei loh takin midfielder Bruno Cesar chuan minute 47-naah Sporting tan goal hmahruai a khung. Zinedine Zidane-a'n tlarhmaah Ronaldo, Gareth Bale, Karim Benzema leh Toni Kroos te nei mah se an si phurh an sut thei mai lo a, chak lo thei dinhmunah an ding rei hle.
Ronaldo nge nge
Real Madrid an mualpho mai dawna a lan hnuah Ronaldo chuan minute 89-naah freekick a hlawh chhuak a, yard 25 a hla aṭangin an si phurh sutna goal a khung. Portugal captain hian amah chher liantu club laka a goal khung a lawm duh lo a, stadium hmar lama Lisbon fans 5,000 vel awmkhawm lam hawiin thuphachawi nan a ban a phar ringawt. Substitute Morata chuan hun pek belhah amah ang thoa bench aṭanga tlan lut James Rodriguez siamsak chu Real chaknan goal-ah a tauh lut.
Kum 31-a upa Ronaldo hian Chamnpions League-ah bik freekick aṭangin goal 12 a khung tawh a, Europe-a club inelna lian berah hian goal khung hnem ber ni mekin goal 94 a nei tawh - heng a goal khung zinga 79 te chu Real Madrid tan match 76 a khelh aṭanga a khung a ni.
Champions League-ah Ro-naldo hian a club hlui ṭum nga a hmachhawn tawh a, goal a la khung vek - a club hlui lakah zahngaihna a lantir ngai lo. United tana a khelh laiin kum 2007 khan Sporting lakah an khelmual leh khualmualah goal a khung. Real Madrid tana a khelh hnuah kum 2013 quarterfinal-ah khan inkhel pahnihah United lamah a khung ve ve bawk.
Eng nge an sawi?
Real Madrid manager Zidane chuan, "A chang chuang team khelṭha leh huaisen kan hmachhawn a ṭul ṭhin, chutiang hunah chuan ka nauten beidawng duh loa an thawrimna leh beih letna rah an hmu ṭhin. Hamrik hnuhnung ber a rik dawn thlenga ka nauten an beih let avang khan ka chhuang hle," a ti.
Zidane chuan substitution chungchang sawi chhun-zawmin, "Substitution siam hi coach hna a ni a, inkhel boruak leh game thlak turin kan siam
ṭhin. Vawiin khan player pathum ka luhtirte khan an hna an tlin a, an tihtur diktak an ti a ni," tiin Morata, Rodriguez leh Lucas Vazquez te bench aṭanga a luh tir chu ti fuh a intih thu a sawi.
Sporting boss Jorge Jesus chuan, "Real Madrid khel-mual-ah bik chuan keini aia khelṭha thei kha an awm bik chuang lo ang. First half-ah khan Real khan goal khung theihna hun an nei miah lo! Mahse, hun pawimawhah Champions League nomawi kawltu an nihna a rawn lang a, minute hnih chhung lekin inkhel an thlak danglam vek a ni," tiin hun tawp dawna an inlehthal tir chungchang a sawi.
Dortmund an hrâng!
Group F inkhel dangah Borussia Dortmund chuan Poland club zinga kum 20 chhunga Champions League group stage khel thei hmasa ber Legia Warsaw chu Mario Gotze, So-kratis Papastathopoulos, Marc Bartra, Raphael Guer-reiro, Gonzalo Castro leh Pierre-Emerick Aubameyang te goal khat ṭheuh khung hmangin 6-0 in an sawp.
Dortmund tan hian fapa tlanbo kir leh Gotze a khelṭha hle a, goal hmahruai a khung bakah a ṭhiante khung tur vawi hnih a siamsak bawk. Bayern Munich aṭanga nipui laia an laklet Gotze hi Dortmund fan-te thinglungah 'Juda' lo ni tawh mah se khelmual chhunga a chet dan a zirin tun hma lama an ṭan rawn ang kha a ni leh thei ang.
Champions League inelnaah hian Paris St-Germain, Juventus leh Bayern Munich te chuan inkhel pakhatah player paruk hmangin goal an lo khung tawh a, heng club ṭha pathumte tih theih ang chu Dortmund hian an rawn ti thei ve ta chiah.
Dortmund coach Thomas Tuchel chuan, "Awlsam tak anga a lan ang ngawt kha a ni lo a, a lang loah kan thawkrim a ni. Kan khingpuite kha an chhe viau nge keini lam kan ṭha fal tih kha sawi a ṭul ber kher lo. Vawiina chiang taka lang erawh a khel ṭha zawk kan ni. Champions League match khata goal ruk khung hi a
ṭha hle a, hetianga kan khelh
ṭhat chhunzawm theih pawh ka beisei," tiin a sawi.
Tuchel hian season hmasa aṭang khan German club hi a enkawl ṭan a, tun ṭum hi Champions League-a a inlanna hmasa ber niin a bulṭan dan hi a duhawm hle.