Japan-ah Sindhu inlan dawn lo

Rio Olympic silver medalist PV Sindhu chu tun thla ni 20 aṭanga khelh tur Japan Open Super Series-ah a inlan dawn lo a, September 27
aṭanga khelh ṭan tur Korea Open Super Series-ah pawh a inlan loh tur thu a coach Pullela Gopichand-a'n a sawi.

Kum 21-a upa Sindhu hian India hmeichhe shuttler-ten tun hma lama an la tih theih ngai loh tiin Rio-ah khan silver medal a dawng a, tun dinhmunah chuan Hyderabad nula hi India beiseina a ni mek.

Coach Gopichand chuan, "Hun ropui danglam bik a tawn avangin a inkhelh chhoh dan tur pawh ruahmanna fel tak kan siam a
ṭul a, Denmark Open leh thla leha khelh tur French Open-ah a inlan ang," tiin a sawi. World number 10 Sindhu hi November thla a khelh tur China Open Premier leh Hong Kong Super Series-ah pawh inlan thei tura beisei a ni.

Gopichand chuan sawi chhun-zawmin, "Olympic-a hlawhtlinna a chan hnuah inelna hmachhawn turin inbuatsaih chhunzawm mah se lawmpuina a dawn hnem avangin thil dangah a rilru a kal hnem a, inkhel turin a la inpeih tawk lo. Khawvel hriat a nih takah chuan a khingpui ten amah hneh dan tur an ngaihtuah nasa dawn tih a chiang a, anni hneh let tura a inbuatsaih a ṭul," tiin a sawi.

Tun dinhmunah Saina Nehwal chu inhliam vangin a chawl mek a, Sindhu a inlan theih dawn loh tak bawkah chuan mipa shuttler Kidambi Srikanth chu team hruaitu niin Ajay Jayaram, Sai Praneeth leh HS Prannoy te pawh an inlan bawk ang.