Bengaluru-in Rovers an hneh

I League champion Bengaluru FC chuan Nilaini tlai khan AFC Cup quarterfinal first leg-ah an mikhual Tampines Rovers chu CK Vineeth-a goal khat khung hmangin 1-0 in an hneh a, Asia-a club inelna sang ber semifinal lut turin beiseina an la nei zel.

South Indian club tan Sunil Chhetri chuan a hun ṭha neih vawi hnih lai a khawhral a, Singapore club tan Liverpool winger hlui Jermaine Pennant leh Jordan Webb ten an hun ṭha neih an khawhral ve bawk.

Bengaluru tan defender Lal-chhuan-mawia leh midfielder Mal-sawmzuala ten inkhel bul ṭan lo mah se second half-ah tlan luhtir an ni a, goalkeeper Lalthuammawia Ralte leh striker Daniel Lalhlimpuia ten bench lamah an hun an hmang tluan thung.

Barcelona assistant manager hlui, tun season aṭanga Bengaluru enkawltu Albert Roca chuan, "Coach ka nihna angin kan khelh danah ka lawm a, kan hun neih ṭhat dan ngaihtuah erawh chuan tun aia ṭha zawka khel thei kan ni. Football-ah chuan hmalam pan zel tur kan ni a, hmasawnna tur tam tak kan la nei a ni," tiin hmasawnna tur an la ngah thu a sawi.