Chanmari FC Chhinga Veng FC Tu nge ngialnghet zawk?
July 30 khan Chanmari FC-in I Day Football-ah Chhinga Veng FC 2-0 in an hneh. Hetihlai hi chuan Lalsangzuala Hmar hote tualchhung football thunun thei tur khawpin an khel ṭha a, MPL kaithar Chhinga Veng erawh zuih ral leh mai tura ngaih an ni hman.
Thla hnih em pawh a ral hmain Chhinga Veng hi MPL2 champion Chanmari FC elpha tura ngaih an ni tawh - vawiin tlai dar 2:30-a club pahnih intawn hunah pawh hian rinkai zawk sawi tur an awm tawh lo.
Intawn Hmasak
Kumin I Day Football-ah Aizawl FC hneh zo hlim Chanmari FC-in Lalruatfela Zote leh Malsawmfela-te goal hmangin Chhinga Veng FC 2-0 an hneh zui a, goal hnih hi insawp tih ṭawngkam hmanna tur ni lo mah se hemi ṭum hian kawng tinrengah MPL2 champion an chungnung.
Chhinga Veng tlarhnung ten Sawmfela dan ngaihna an hre lo a, goal khungtu Ramhlun South tlangval leh Fela Zote te chevel a hmuhnawm takzet.
Chanmari FC ten MPL
ṭan hmain an theihna san zia an lantir hman a, MPL-ah pawh cheṭha tura ngaih ni mah se I Day Football semifinal-a Ramhlun North laka an mualpho avang leh MFA Super Cup final-a an elpui Aizawl FC laka an tlawm avangin ngai an la awh lo niin a lang.
Chanmari an dam
MPL5-ah inhliam vangin Chanmari FC an buai. Match hmasa berah Dinthar FC nen 1-1 a an inhnehtawk ṭuma bul
ṭantu zingah player pali captain Lalrinchhana Tochhawng, Thomas Lalengkima, C. Lal-rosanga leh Lalrammawia te chiah kha Chhinga Veng an hneh
ṭuma starting XI chang phak an ni.
Vawiin tlai hian Chanmari FC-in keeper Lalmuanawma la chhawr thei dawn lo mah se Sawmfela leh Fela Zote te bakah midfielder R. Malsawmtluanga, Lalrinchhana leh winger Lalmuanzova te an dam tawh.
MPL2 champion hian Chhinga Veng hmachhawn turin player ṭha zawk an chhawp chhuak thei dawn a, "Team hmuhnawm tak an ni leh thei ang em?" tih hi hmuh a chakawm.
Chanmari FC manager Mawi-tea chuan, "Mipui min ngaihdan chu eng pawh ni se kan pawm mai a ṭul, midang ngaihdanah inrawlh theihna kan nei lo. Keini chuan ṭha taka khelh kan tum a, Dinthar FC kan khelh
ṭum pawh khan kan khelh chhiatna ka hre lo. Goal kan khung theih loh vangin kan vanduai ni maiah ka ngai, a chhan chu kan ball possession kha 70% neih laite kan nei pha tlat a, khel chhia kan ni thei lo," tiin tlahniama a inngai lo.
Chhinga Veng an ṭang
MPL kaitharin champion an tum tih a chiang a, tualchhung player ṭha an lakluh tawh bakah foreigner pahnih lak an tum.
Chhinga Veng coach Lalremtluanga chuan, "Kan chak lohna lai thuam chak turin foreigner pahnih kan lalut dawn a, Dinthar FC kan hmachhawn hunah kan chhawr hman kan beisei," tiin insiamṭhat chhoh zel an tum thu a sawi.
Team dang nena an dang-lamna sawiin Chhinga Veng boss RT-a chuan, "I Day Football leh MFA Super Cup-a result ṭha kan nei lo chung pawhin club hruaituten kei leh player-te chungah pressure min siam lo. Ka sawi tawh angin player-te nen kan zavaiin kan tihsual aṭanga insiamṭhat kan duh a, kan thawhrim avangin result ṭha zawk kan neih chhoh zel hi kan beisei tlat a ni. Club dang chanchin ka hriat danin coach ṭhenkhat chuan an hmalam hunah pressure nasa tak an nei tawh a ni," tiin Vanglaini palai a hrilh.
Chhinga Veng coach hian eng club ber nge sawi lang lo mah se an khingpui tur Chanmari FC a sawina niah a ngaih theih a, hei vang hian vawiin tlai inkhel hi a pawimawh sawt ang.
Sawmfela Vs Dawngtea
Chanmari-in Sawmfela an nei a, Chhinga Veng-in MS Dawngliana (Dawngtea) an nei.
Player pian leh khelh dan inang lo tak pahnih hi Santosh Trophy hnuhnung bera Mizoram tlarhmaa inkawpte kha an ni a, an khelh ṭhat ni chuan tualchhung football-ah anni aia ṭha an awm lo.
Damlohna vangin Dawng-tea'n I Day Football-ah a club hlui a hmachhawn thei lo a, tunah erawh a dam tawh. Kelkang tlangval Khawpuimawia leh Dawngtea-te inkawp nge ṭha zawk Sawmfela leh Fela Zote te inkawp, tih chu vawiin tlaiah tihchian a ni dawn.
Eng nge an sawi?
Chanmari FC manager Mawi-tea chuan, "Tlai lama in-khelh hi chuan entu neih a harsa ṭhin. Chanmari hian tun hma chu kan pha tawh lo tih chu kan hria a, mah se kan chhiat lutuk vang a ni lo. Kan inkhelh hun hi a la fuh tawk loh vang a ni a, zana kan inkhelh hunah chuan entu an tam sawt ang. Chutihrualin Chhinga Veng kan hmachhawn hunah hian veng chhung mipui ṭawiawmna
ṭha zawk kan beisei a, result
ṭha neih nan ṭantu tam zawk kan mamawh a ni," tiin an veng mipui inkhel en turin a sawm.
Chhinga Veng coach Lal-remtluanga chuan, "MPL club te hian champion an tum vek a, champion thei vek pawh kan ni a, club tin kan intluk tawk tih a chiang. Taima leh huaisen apiang an ding chang ang," tiin Vanglaini palai hrilh.
MPL kaithar Chhinga Veng FC-in ṭantu an nei ṭha a; amaherawhchhu an match hnuhnung bera Zo United nen an inhnehtawk ṭuma inkhel tibuai thei tura halmawi an hal avangin pawisa chawitir an ni. Chutihrualin 'Chhingcows' hi MPL5-ah ṭantu nei ṭha ber an la ni rih a, vawiin tlai pawh hian an thawk chhuak chhe lo tawp ang.