Stamford Bridge-ah Klopp-a hoin Reds

Zanin dar 12:30-ah Liverpool-in Stamford Bridge-ah Chelsea an lenchilh dawn a, football khawvela manager ropui pahnih Antonio Conte leh Jurgen Klopp-te thluak hmangin an inbei dawn - manager pahnih hian an intawnna hmasa berah a dingchang lo zawk nih an duh lo tawp ang.

Team pahnihin Europe inelna an khelh phak loh avangin chhuanlam tur an nei lo a, chau loin player-te an inhmachhawn thei dawn. Chelsea-in an league match hnuhnung berah Swansea 2-2 in an inhnehtawkpui a, Liverpool-in 4-1 in champion lai Leicester City an sawp thung.

Chelsea an chet chhiat chhun-zawm dawn nge Stamford Bridge-ah Liverpool an tawlh thlu dawn? tih chu Premier League ngainatu te hriat chak a ni a, zaninah chinfelin a awm ang.

Costa hlau rawh u

Chelsea striker Diego Costa-a'n tun season league match li a khelhah goal li a khung tawh a, Blues striker hi Jurgen Klopp chuan a fak hle. German coach chuan, "Costa hi khelmualah chuan ral do huai ang mai a ni a, a taksa a hmang thiamin player quality sang bik a ni. World Class player a ni a, chu chu player kan fak theih dan sang ber a ni," tiin an khingpui tur striker a fak hle.

Klopp chuan Chelsea chung-chang sawi nghalin, "Chelsea hi kum hnih liam taah khan champion an ni a, season harsa tak an hman hnuah manager thar ruaia an insiamṭhat mek avangin chona hautak hmachhawn turin kan inpeih a ṭul a ni," tiin Blues khelmualah inkhel awlsam a beisei lo.

Terry tel lohna Chelsea

Chelsea captain John Terry-a'n Swansea an hmachhawn ṭumin hliam a tuar a, kum 35-a upa central defender tel lo hian Blues-in Reds an mikhual a ngai dawn. Mahse, Chelsea hi buai lutuk tur an ni lo, Paris St-Germain
aṭanga an lakluh David Luiz chu Terry aia lut turin a inpeih tawh.

London club hian Stamford Bridge-a Liverpool an mikhual hnuhnung league match pakuaah vawi hnih chiah hnehna changin vawi li an tlawm a, an record a chhuan-awm loh hle. Mahse, Chel-sea hian manager thar Conte an nei miau a, Italian manager hian January 2013 hnuah a club enkawl khelmualah tlawm hmel a la hmu ngai lo - 'Pep Guardiola of Turin' tia Klopp-a'n a fak manager hian a record duhawm thai chhiat a duh dawn lo.