Zanin dar 7-ah 100% chak record nei Bethlehem VT Vs Ramhlun North

MPL5 ṭan hmaa beisei pha lo Bethlehem Vengthlang FC-in coach Lalbiaksanga Colney kaihhruaina hnuaiah Zo United FC leh Chanmari West FC hneh tawhin league hma-hruaitu an ni. Zanin dar 7:00 hian BVT hian I Day Football finalist Ramhlun North FC an hmachhawn ang.

Ramhlun North hian I Day Football group stage-ah knockout stage luh beiseina nei tawh lo BVT chu 3-0 in an sawp a, MPL kaithar hian final an thleng hial. MPL-ah Lalruatliana Sailo (Tawia) hnuaia khel Ramhlun North-in Dinthar FC an hneh nghal a, Aizawl FC nena an inkhelh hun erawh sawn a ni.

Phuba lak tum

BVT coach BS-a chuan, "I Day Football-a kan chak loh ṭum kha kan la hre reng a, hneh let ve ngei kan tum a ni. Chutihrualin Ramhlun North hi player langsar bik nei si loin team anga an khelh avangin khelh an harsa a, vanduai theihna team an ni. An team hi uluk takin kan zirchiang a, chumi mil chuan ka player-te pawhin hna an nei ang," tiin awmze neia player-te a rem tur thu a sawi.

Ramhlun North tan I Day Foot-ball-a best player Zosangliana (Chhaia) a langsar a, Dinthar FC an hneh ṭumin Chhaia hi man of the match a thlan a ni. BVT hian Ramhlun North playmaker dah

ṭhat an tum a ni thei a, tlarhma lama awm Vanlalthlamuana uluk zawka ven an tum a ni thei bawk.

Engtin zel?

BVT player-te an dam kim a, Ramhlun North lakah point hloh an tum lo. BS-a chuan, "Phase 1-ah hi chuan risk kan la ang. Kan match zawng zawngah chak tumin kan khel vek ang a, Ramhlun North lakah pawh point hloh kan tum lo," tiin attacking football khelh an tum thu a sawi.

Ramhlun North lam an zam bik lo a, coach Lalruatliana Sailo chuan, "BVT hian game thlak danglam thei player chu an kawl ngei a, point ruk hmu tawh mah se an khelah erawh ṭha tih lai hmuh tur ka la nei lo. Chak tumin kan khel dawn a, league a nih avangin goal venhim kan ngaihthah lo ang," tiin Vanglaini palai a hrilh.

Mipui chungchang sawiin Tawia chuan, "Ramhlun North mipuite hi mawi takin an au ṭhin a, player-te pawh an phur phah
ṭhin hle. BVT nen zanah kan inkhel dawn a, kan inkhel en ngei turin supporter-te ka ngen a ni," a ti.

Bethlehem VT hian MPL ṭan hmaa result an neih ṭhat tawk loh avangin ṭantu pawh an nei tam tawk lo a, Ramhlun North erawh thawm
ṭha tak nei tham an awm thung. MPL kaithar hi first division club an nihlai aṭanga ṭantu nei ṭha an ni a, BVT-in khelmual pawna an khingpui tluk tur chuan an ṭan ve fe a ngai ang.

Team Dinhmun

Team Pld W D L GF GA GD Pts

1 Bethlehem VT 2 2 0 0 3 1 2 6

2 Chhinga Veng 2 1 1 0 2 0 2 4

3 Ramhlun North 1 1 0 0 1 0 1 3

4 Chanmari West 3 1 0 2 5 4 1 3

5 Chanmari FC 1 0 1 0 1 1 0 1

6 Dinthar FC 3 0 1 2 1 6 -5 1

7 Zo United 2 0 1 1 0 1 -1 1

8 Aizawl FC 0 0 0 0 0 0 0 0