October-ah Flying Christabel MPL U18

Mizoram Premier League Season 5 Under 18 inelna chu October chawlhkar thumnaah hian khelh ṭan a ni dawn.

MPL Under 18 hi Flying Chris-tabel-in an sponsor dawn a, anni hi Canteen Kual, Dawrpuia awm niin zin veivahnaa (air ticketing) an buaipui theih bakah tour operator an ni tel bawk a; tun season Under 18 inelna hi 'Flying Christabel MPL Under 18' tih a ni ang.

MPL Under 18 intihsiaknaah hian January 1, 1998 leh a hnu lama piang chin tan khelh theih a ni ang. Club pariatte vawi khat ṭheuh an inkhelh kual hnuah a sang paliin semi final an khel dawn a, chumi zawhah final an khel zui ang - semi final leh final hi single leg-a khelh ve ve tur a ni dawn.

MPL-ah hian Under 17 inelna kalpui ṭhin a ni a, MPL4 aṭang khan AIFF-in Under 18 I League a kalpui tawh zulzuiin Under 18-ah siam danglam a ni.

MPL U18-ah hian champion lai chu Mizoram Police an ni a, MPL aṭanga Police an relegate avangin kum zawna champion thei Police U18 team an inlan thei dawn lo. MPL Under 17 a nih laiin Chanmari FC-in ṭum hnih nomawi an lo chawi tawh bawk. Mak ang reng tak chu inelna vawi li neih tawha final la lut vek Dinthar FC an la champion lo.