Chhinga Veng chetsual Chanmari chakna

17th September, 2016

Chanmari FC-in Mizoram Premier League-a anmahni elphak tum Chhinga Veng FC chu nimin tlai khan 4-1 in an sawp a, an goal khung danah erawh inchhuang thei an ni lo. Chanmari FC hi MPL kaithar player-te tihsual vanga goal li khung an ni.

Lammuala inkhel nung tak-ah Chanmari tan R. Mal-sawmtluanga, Lalruatfela Zote, Malsawmfela leh Lalmuanzova ten goal khat ṭheuh an khung.

Chhinga Veng-in goal hnih an chhuah hnuah Lalramfelpuia goal hmangin beiseina nei leh mah se, Lalremtluanga hote mang duhawm loh aṭangin an harh chhuak lo.

Tihsual 4

Minute 5-na leka mual vei lam aṭanga Chanmari defender C. Lalrosanga vawrh luh chu Chhinga Veng keeper R. Lalhmangaihzuala'n man nghet zo loin MS-a'n awlsam takin a tauh lut.

Minute 34-naa Rosanga freekick pet naran tak chu keeper Lalhmaa thoin Fela Zote tana duhthusamin a hnek tla a, cool takin a khung.

Second half-ah Chhinga Vengin keeper thlakin Vannun-mawia an luhtir a, an buaina sut kian a ni chuang lo.

Minute 72-naah Lalchhan-chhuaha'n midfield-ah ball a hloh avangin Sawmfela'n ṭha takin ball a lalut a, a ball pet hi goal tur khawp niin lang lo mah se keeper Nunmawia'n ho takin a chhuah.

Hun tawp hma minute thum chiah a awm tawh tihin Chanmari winger Muanzova cross sual chu goal zawnah a kal a, Chhinga Veng keeper Nunmawia a khum chiah chiah. Venghlui rawlthar hian hemi hma hian Muanzova zawnah cross ball a nam per a, Aizawl FC winger hlui hian a hrem lo hlauh.

Coach ngaihdan

Chanmari FC coach Lal-sangzuala Hmar chuan, "Chhinga Veng-in keeper an nei ṭha lo tih kan hria a, an tihsual theih nan ball kan vawrh a ni. Kan game plan a ni a, vanneih vanga goal khung kan ni lo," a ti.

Chhinga Veng coach Lal-remtluanga chuan, "Kan keeper-te an tisual tih ka pawm a, an chungah erawh rinna ka nghat chhunzawm zel ang. An tihsual aṭanga tho chhuak thei lo an nih chuan goal veng tlak a ni lo tihna a ni," tiin an keeper-te a chhan.

Defence 3?

Chhinga Vengin team ṭha Chanmari FC an hmachhawn a, tlarhnunga an player rem zat chu pathum a ni!

Goal an chhuah tam chhanah hian keeper chetsual chu ni bawk mah se an khelh dan vangah a ngaih theih bawk. Hemi chungchanga Vanglaini palai zawhna chhangin coach RT-a chuan, "Kan defender pangngai zingah VL Thanga leh Felpuia te chiah an dam a, kan player neih danin a zir loh avangin formation dang deuh kan hman a ṭul a ni," tiin a insawifiah.

Chhinga Veng an khel chhe lo a, hun chanve hma-lamah Van-lalawma'n goal ban a pet per bakah Lal-khawpuimawia'n hnai tak
aṭangin a hlah a, penalty area-ah Chanmari defender kutin ball fuh mah se penalty an hmu lo a, striker MS Dawngliana'n amah chiah awmah ho takin a tauh lut lo bawk.

Second half-ah Felpuia'n mar ṭha takin goal khung mah se keeper chetsual vangin an phûr rei rei lo. Dawngtea a inhliam bawk avangin insiamṭhat an harsat a, Kelkang tlangval Mapuia ball tauh vawi hnih chu goal chung leh sira chiah chiahah a kal avangin Chanmari vanneih
ṭumah a ngaih theih bawk.

Chhinga Veng hian fans leh players nei ṭha mah se I Day Football, MFA Super Cup leh MPL5-ah mipui beisei game hmuhnawm leh inman tak an la nei lo - player siksawi kual reng rengin an buai a, an thawm rin an la ni lo!

Inkhel thunun

Chanmari FC-in si hniha hma hruai pawhin Chhinga Veng beiseina an ti mit thei lo a, an la hlauthawng reng. Inkhel an thunun theih lo a, MFA Super Cup final-a boruak sang an zo lo pawh thil mak a ni ta lo, hnehna chang mah se insiam ṭhat an mamawh.

Chanmari FC coach Sanga chuan, "First half-ah inhliam vangin MS-a lakchhuah a ngai a, midfield-a awm Reuben-a la dam chiang lo. Chutiang bawkin Sawmfela leh Fela Zote te an nih tur ang an la ni pha lo. Hei vang hian inkhel thunun a har a, kan tih theih chhun chu attacking football khelh a ni," tiin Vanglaini palai hnehah inkhel a thunun theih loh chhan a sawi.

Tute nge inlan?

Chhinga Veng (3-2-1-3-1): R. Lalhmangaihzuala (Vannunmawia 46'); Isaac Lalremruata, Vanlalthanga, Lalramfelpuia; Joseph Lalnunpuia, Paul Ramfangzaua; Lalchhanchhuaha; Vanlallawma, M.S. Dawngliana (Lalsawmzela 51'), Lalthlamuana (H.Lalmuankima 46'); Lalkhawpuimawia

Chanmari FC (4-3-3): M.S. Dawngliana; Thomas Lalengkima, Lalrinchhana Tochhawng, C. Lalrosanga, Ramfangzaua; Reuben Zosangpuia, Lalruatfela Zote, R. Malsawmtluanga (Lalrinchhana 33'); Lalmuanzova (Rochhingpuia 90+1'), Malsawmfela, Ṭhasiama (Lalrammawia 71')

ZoFooty Statistics

Chhinga Veng 1- 4 Chanmari FC

CVFC : Lalramfelpuia 60'

CFC : R. Malsawmtluanga 5'; Lalruatfela Zote 34'; Malsawmfela 72'; Lalmuanzova 87'

MoM : C. Lalrosanga, CFC

54% Ball Possession 46%

20 Shot(s) 13

6 On Target 7

1 Yellow Card (s) 4

0 Red Card (s) 0

Mobile Showroom