Higuain hian a man a phu - Icardi

Pathianni zan dar 9:30 hian Serie A-ah inkhel hmuhnawm a awm dawn a, champion lai Juven-tus chu Inter Milan luhchhuah tumin San Siro Stadium-ah an lenglut ang.

Inter captain Mauro Icardi chuan an inkhel tur thlirin boruak a lo siam lawk a, an khingpui tur Juve striker Gonzalo Higuain chuan Napoli aṭanga Turin a panna man pound maktaduai 75.3 chu a phu hlea a hriat thu a sawi - Icardi hian Argentina tana tluk loh chungah hian a rilru tak a sawi em tih erawh hriat a ni lo.

Kum 23-a upa Icardi chuan, "Ka ngaihdan chuan Juve-in Higuain an lakluh nana pawisa an hman zat hi a awm rengah ka ngai. Higuain hian season hmasa khan Serie A-ah goal 36 a khung thei a, a man zat hi a phu. Player dangte nena khaikhin chi a ni lo, ani hi khawvela striker ṭha ber chu a ni," tiin a sawi.

Kum 29-a upa Higuain hian Juve a pan hnuah Napoli leh Real Madrid tana a khelh lai ang tho khan goal khung a bansan chuang lo a, league match thum khelh tawhah goal thum a khung leh der tawh.

Juve hi Champions League-a Sevilla nen goal lut loa inhnehtawk hlim an ni a, nipui laia Barcelona aṭanga an lakluh defender Dani Alves-a'n goal khung tuma an inzir belh thu a sawi avangin Inter tlar-hnung hna a hautak dawn.

Hetihlai hian Inter Milan pawh Europa League-a Hapoel Be'er Sheva 2-0 a hneh lo hlim an ni. Manager Frank de Boer tan Israel club hneh loh hi mualphona a tling a, an mualphona hliahkhuhna hun ṭha an neih hi chhawr ṭangkai ngei an tum ang.