Dilly ding dilly dong - Foxes rimawi?
Season hmasa khan Leicester City boss Claudio Ranieri chuan a player-te chu Premier League zinkawngah an mutthluk thian loh thu a sawi a, inelna hautak hmachhawn laia an mutthlu a nih chuan "Dilly ding dilly dong" tiin ka kai tho ang tiin a sawi - Ranieri-a dar tum rimawi nen season tawpah Foxes-in Premier League nomawi an chawi.
Tun season Premier League-ah Foxes-in beisei angin bul an
ṭan lo a, league match li an khelh tawhah vawi khat chiah hnehna la changin point li an nei mek a, Italian manager tan "Dilly ding dilly dong" tia a player-te fuih phur a hun leh tawh em ni? tih chu zawhna awm a ni. Zanin dar 7:30-ah Burnley an mikhual ang.
Foxes hi Champions League-a Club Brugge 3-0 a hneh hlim an ni a, player pawimawh Riyad Mahrez chuan goal hnih a khung bawk. Ranieri chuan, "Dilly ding dilly dong tih ai chuan Champions League rimawi khan a chawk phur zawk a ni mahna," tiin a player chungchangah fiamthu a thawh zui a, zaninah Foxes-in hnehna an chan dawn chuan Algeria international chet ṭhat a pawimawh dawn.
Champions League-a an match hmasa berah Foxes an chak nghal a, Ranieri-a'n a phur sual a hlau hle. Chelsea manager hlui chuan, "Tunah chuan kan phurna leh nuam tihna te hnung lama kan dah a hun a, Burnley chiah ngaihtuah a ṭul," tiin mikhual team lakah chetsual a tum lo.
Premier League club Champions League-a inlan zingah Tottenham Hotspurs chiahin an match hmasa berah Monaoc mikhualin point an hlawh chhuak zo lo a, Pathianni zan dar 9:00-ah Spurs hian league match-a chak la nei lo Sunderland an mikhual dawn.
Tottenham manager Mauricio Pochettino-a'n Monaco an hneh lohna inkhelah a naute chuan chak duhna thinlung an nei tawk lo nia a ngaih thu a sawi a, Balck Cats an hmachhawn hunah beiseina sang zawk a nei ang.
Spurs hi Champions League-ah chak zo lo mah se Premier League-a an match hnuhnung berah erawh 4-0 in Stoke City an sawp thei a, David Moyes-a nauten Europe inelnaa chak lo thinrim an tawng baw lo ang tih a sawi theih loh.