Houdet leh Peifer an champion

Rualban lo ten infiam-na khawvelah theihna an neihsan zia an pholang mek zel. Rio Paralympic neih mekah French tlangval Stephane Houdet leh Nicolas Peifer te inkawp chuan darkar khat leh minute 59 chhungin British duo Gordon Reid leh Alfie Hewett te chu 6-2, 4-6, 6-1 a hnehin mipa wheelchair tennis doubles-ah an ram tan gold medal an hlawh chhuak.

Houdet chuan, "Ka ṭanpui Peifer hi a taksa a chak bakah a rilru a huaisen a, ram tana kan khel a nih phei chuan a theihna zawng zawng hi a hlan bik hlein ka hre ṭhin," tiin a ṭanpuipa a fak.

Tennis inelna lian Grand Slam pali Australian, French leh US Open bakah Wimbledon-ah te wheelchair inelna hi telh a ni a, Reid leh Hewett te hi Wimbledon champion lai an ni nghe nghe. Kumin US Open bikah kha Paralympic neih tur avang hian wheelchair tennis hi neih a ni ve lo thung.

Rio Paralympic neih mekah nimin thleng khan China chuan gold 84 la tawhin hmahruaitu an ni a, gold medal 46 latu Great Britain te chu pahnihna niin India chuan gold pahnih a la tawh a, medal table-ah 33-na an ni mek.