India-in UAE ngam lo

Asian Football Confederation (AFC) Under 16 Championship chu Ningani zan khan khelh ṭan a ni a, inelna thlengtu India chuan an match hmasa berah United Arab Emirates chu 3-2 in an ngam lo nghal. Group A inkhel dang--ah Saudi Arabia chuan 3-2 in Iran an hneh bawk.

Fatorda Stadium, Goa-a inkhelah India-in first half-ah Sanjeev Stalin-a freekick hmangin hma an hruai a, UEA pe-nalty hlawhchhuah chu goalkeeper Dheeraj Singh-a'n ṭha taking dang mah se corner aṭanga Manea Aydh-a ball tauh luh erawh a dang hman bik lo. Team pahnih 1-1 a an inhnehtawk hnuah Boris Thangjam chuan India-in hma an hruai vawi hnihna ni turin mual--neitu team tan goal a khung a, goal dang lut loin chawlhlawk hman a ni.

First half-a khel ṭha India-in chawlhlawk hman a nih hnuah beisei an phak lo a, minute 53-naah India tlarhnung talbuai karah Majid Rashid chuan UAE tan an goal hnihna a khung. Minute 73-naah UAE bawkin Ahmad Fawzi hmangin an goal thumna an khung a, India lamin a chhanletna tur an neih loh avangin 3-2 in a tlawm zawkah an ṭang.

India coach Nicolai Adam chuan, "First half duhawm tak khel a, second half theihnghilh vang vang tlak kan khel bawk. UAE kha an thawkrim em em a, lawmpui an phu a ni," tiin an khingpui team a lawmpui thu a sawi.

Kum 2014-a Euro Under 19 Championship khel tura Azerbaijan U19 hruai thleng thei coach chuan sawi chhunzawmin, "Football-ah chuan hnehna chan loh chang kan nei ang, chak reng theih ani lo. Kan chak emaw chak lo emaw engkim hi zirlai vek a ni. Hnehna kan chang lo a, naupangte pawn hrehawm an ti hle. Mahse, hei hian kan match khelh leh tur atan min tuai hriam tur a ni a, inzir nan kan hmang tur a ni. UAE-in chak an phu a, an chak a ni mai. Keinin kan tih tur chu in zir leh a aia ṭha zawka khel tura inbuatsaih a ni," a ti.

India hian Pathianni zan dar 7:00-ah Saudi Arabia an hmachhawn leh dawn a, an inkhel hi Star Sports HD4 lamah live-in en theih a ni ang.